Mothers Comfort Zone Mothers Comfort Zone
أفكار منزلية وأنشطة لطفل التوحد؟! هو ينفع طفل التوحد نعمل معاه أنشطة منزلية؟! وهل ممكن تجيب نتيجة بجانب العلاج؟.
أم الطفل التوحدي أو أي طفل عنده قدرات خاصة بتجاهد أنها تعمله كل شئ كويس ينمي مهاراته، بجانب العلاج والجلسات.
جينا النهاردة نقولك على أنشطة تقدري تعمليها بحاجات متوفرة في البيت.
الأول بس نفهم شوية تفاصيل مختصرة هتساعدنا في الإبداع.
مشكلة الطفل التوحدي
طيف التوحد أو (Autism Spectrum Disorder) ينتج عنه اختلال في تواصل الطفل مع العالم المحيط، يعني الطفل بيستقبل المؤثرات الحسية زي الصوت والضوء وملمس الأشياء بشكل غير طبيعي، ويرد بردود أفعال غير طبيعية.
يعني الصوت اللي أنت بتسمعي عادي هو هيسمعه عالي جدًا، وكذلك الضوء وبقية المؤثرات.
عشان كده التجمعات والزحمة والدوشة بتثير أعصاب طفل التوحد وتوتره، وممكن تدخله في نوبات غضب شديدة.
وساعات تانية بيكون مش مستقبل المؤثرات بطريقة جيدة، بالتالي مش بيعمل رد الفعل المطلوب.
اضطرابات التوحد كتير؛ تتراوح بين حساسية للمؤثرات الحسية، مشاكل هضمية، نوبات قلق، اضطرابات نوم، تشتت الانتباه، أو الاكتئاب.
عشان كده تنمية مهارات طفل التوحد بتكون بالإهتمام بحواسه وتنبيهها، علشان تساعده يتواصل مع العالم واحدة واحدة ويركز في الأشياء الصغيرة عشان يبدأ يستوعب الصورة الكبيرة بشكل أحسن.
أنشطة أطفال التوحد
ممكن نعمل أنشطة كتير لأطفال التوحد تساعدهم في تطوير مهاراتهم، طبعًا بجانب العلاج الطبي الدوائي أو الطبيعي، وجلسات التخاطب والجلسات النفسية المتخصصة.
هدفنا في المقال ده نعرض أفكار تساعد الأم في المنزل أنها تشغل وقتها طفلها التوحدي وتسليه وتنميه؛ خلينا نعرضهم عليكم.
أنشطة حركية لأطفال التوحد
ممارسة الرياضة بشكل يومي لطفل التوحد بتساهم بشكل كبير في تخريج طاقة التوتر اللي جوه جسمه، ومن أمثلة الرياضة المفيدة:
- السباحة: بتقوي الجسم وتهذب النفس، والتعامل مع الماء عامة بيخفف حدة التوتر ويهدي الأعصاب، واقرأوا معانا مقال فوائد السباحة عشان تعرفوا أكتر.
السباحة للاطفال | 3 نصائح لا تغفلها قبل التمرين - الزحف: أن الطفل يتني اديه ورجليه ويبدأ يتحرك شبه الدب، ده بيقوي عضلات الجذع، وكمان بيساعده على تنمية وعي الجسم والتنسيق الحركي.
- اللعب بالكرة الطبية: الكور المطاط الكبيرة الموجودة في الجيم دي عارفينها؟ ودي ممكن الطفل يعمل بيها حركات زي أنه يرفعها لفوق فارد أذرعه، أو يحدفها في الحيطة وترجعله تاني.
الحركة دي مفيدة لعضلاته وكمان تحفيز مراكز الدماغ المسئولة عن الذاكرة قصيرة المدى. - القفز: يلا بينا ننط فوق ونلمس النجوم، ونفرد إيدينا ورجلينا شبه حرف x، الحركة دي بتنشط الدورة الدموية جدًا، وتحسن انتباه الجسم.
- تدوير الذراعين: طفل التوحد ساعات بيركز على حركة معينة، ويفضل يكررها بشكل مبالغ فيه، زي التصقيف أو الرفرفة بايديه، لو شغلناه بحركة مفيدة زي تدوير الذراعين، هينشغل عن الحركات المزعجة وكمان ينشط تركيزه.
- تمارين المرآة: خلي الطفل يقف قدام مراية ويتحرك ويحاول يقلد الحركة الظاهرة في المراية، ده بيساعد جدًا في تطوير مهارات التواصل الإجتماعي والبصري اللي بيعاني طفل التوحد من افتقارها.
أنشطة حسية لأطفال التوحد
علشان نحسن تواصل طفل التوحد مع العالم المحيط، لازم ننمي الخمس حواس وننشطهم، ونساعده يركز عشان يفهم الأشياء، من أمثلة الأنشطة دي:
- زجاجة جليتر: نجيب ازازة شفافة نحط فيها مياه وجليتر، ممكن نضيف شوية زراير صغيرة أو كور، ونقفلها كويس، ونديها للطفل يحركها ويركز مع حركة الجليتر والحاجات.
هو حيكون منبهر ومستمتع باللمعان، وكمان ده هينمي التآزر البصري ويساعده على التركيز. - تحدي الملمس: ندي الطفل مجموعة أشياء مختلفة الملمس، زي صوف وحرير وازاز وورق ومطاط أو أوراق شجر، يعني تشكيلة من أشياء مختلفة الملمس.
ونخليه يغمض عينه ويتعرف عليها، هيكون نشاط مسلي ووقت لطيف.
كمان الطفل هيستجمع كل تركيزه في حاسة اللمس عشان يتعرف على الأشياء، وده هيفيده جدًا في تنمية علاقته بالبيئة المحيطة. - نشاط الشم: نجمع أشياء مختلفة الروائح، زي وردة ومانجو وبرفان وورق شجر، أي تشكيلة مختلفة الروائح، ونخليه يغمض عينه ويحاول يتعرف عليهم من الروائح.
- تحدي التعرف على الصوت: نسمع الطفل تسجيلات مختلفة لأفراد الأسرة، أو أصوات حيوانات مختلفة، ونخليه يتعرف عليهم بردو.
- لعبة المذاق: بردو نخلي الطفل يتذوق مجموعة أطعمة ويحدد اسم الأكلة من غير ما يشوفها.
أنشطة فنية لأطفال التوحد
الفن غذاء الروح، ومفيش أحسن من شغل وقت الأطفال بأعمال فنية ويدوية بسيطة، تملى وقتهم ويتغلبوا على الملل، وكمان ينموا مهاراتهم.
- خربشة العملات: فاكرين لعبة زمان، ورقة بيضا فوق عملة ونخربش؛ نلاقي ملامح العملة اترسمت على الورقة، النشاط ده لطفل التوحد بالذات بيساعده على تنمية التآزر العصبي بين الايد والعين.
- صنع الاساور: شوية خرز وخيط، كفيلة أنها تشغل الطفل لساعات وتنمي مهارات عضلات اليد الدقيقة.
- التلوين بالثلج: نملأ قوالب التلج بمياه عليها ألوان ونجمدها في الفريزر، بعدين نديها للطفل يلون على ورق ويستمتع ويرسم.
أنشطة علمية لأطفال التوحد
التعلم باللعب من أفضل طرق التعلم، في أنشطة بسيطة بتساعد الطفل أنه يتعلم باستمتاع ويحس بالمعلومة بكل حواسه مش يحفظها وخلاص، زي مثلا:
- كروت البحث عن متشابه: مجموعتين متماثلتين من الكروت متلخبطين، وأخلي الطفل يطلع الكروت المتشابهة، النشاط ده يساعد على التركيز وممكن نتعلم من خلاله أسماء الحيوانات والأشكال والألوان.
- استخدام أوراق الصنفرة: دي أوراق خشنة شوية بنقصها على الشكل اللي عايزينه، ممكن تساعد في تعلم الحروف والارقام.
قدمنا أفكار أنشطة تدريبية لأطفال التوحد، نرجو تكون حازت إعجابكم وأضافت لكم، وبنأكد أنها مجرد أفكار لشغل فراغ الطفل، ومحاولة تنمية مهاراته.
التوحد تحدي أحنا قده، ونقدر بالالتزام بالعلاج والبروتوكول الموصوف من الطبيب نتغلب على مشاكل كتير ونوصل لأفضل نتيجة مع الطفل؛ ونحول التحدي لنجاح كبير.
Sources: