وصفات خضار سحرية للأطفال.. أكليهم خضار من غير ما يحسوا

رغم فوائد الخضار الكتيرة جدًا؛ إلا إن كتير من الأطفال مش بيحبوه، والأم الشاطرة هي اللي تعمل وصفات خضار سحرية للأطفال تخليهم ياخدوا الفائدة من غير ما يحسو.

تعالي أقولك شوية وصفات مشهورة في بيوتنا ممكن نعمل فيها افتكاسات تزود كمية الخضار فيها ويحبها الأطفال، وتنفع معاهم من سن السنتين وأكبر.

الكوسة البشاميل 

بنقطع الكوسة عادي ونسلقها، ونضيف لها بصلة وورق لورا أثناء السلق، وما نرميش شوربتها دي، لكن نستخدمها في عمل البشاميل.

يعني نخلي البشاميل نصف لبن ونصف شوربة سلق الكوسة، بالتالي البشاميل يكون معزز بفوائد الكوسة اللي نزلت في ماء السلق.

والعصاج ممكن نضيف له جزر مبشور وكوسة مبشورة بردو مع اللحم لزيادة الفائدة.

وأثناء تحضيرها في الصينية ممكن نهرس الكوسة المسلوقة ونخلطها مع بشاميل تستخبى فيه.

وأثناء تجهيز الصينية نخصص جزء لغير محبي الكوسة؛ عبارة عن طبقة كوسة مهروسة بالبشاميل وطبقة عصاج وطبقة بشاميل.

العصاج 

اللحم المعصج العادي ممكن نخليه مفخخ بالفوائد عن طريق بشر كوسة وجزر مع البصل، وتشويحهم قبل إضافة اللحم.

حيستوي كله مع بعض ويختفي الخضار، والأكلة دي تنفع جدًا لسندوتشات التمارين والرحلات، أو لأي وصفة محتاجة عصاج.

اقرأ أيضًا: وصفات الكوسة للرضع.. 5 وصفات سهلة ولذيذة

بابا غنوج  

البابا غنوج من السلطات الرائعة الغنية بالفوائد؛ لكن بعض الأطفال مش بيحبو الباذنجان، تفتكروا نخبيه ازاي؟!

بسيطة جدًا، نشوي الباذنجان كويس جدًا، وفي الخلاط أو هاند بليندر، نضيف له طحينة وزبادي وفص توم وفلفل الوان خاصة الأحمر.

الفلفل الأحمر بيدي طعم مدخن جميل، ونضرب المكونات ناعم خالص ونضيف معلقة خل وعصرة لمونة.

حتبان سلطة ناعمة خالص شبه الطحينة لكنها مليانة خضروات وفوائد. 

صلصة المكرونة

مين مبيحبش المكرونة بالصلصة الحمراء؟! طيب تعرفوا ان الصلصة دي ممكن ندخل فيها فوائد عجيبة؟

مبدئيًا استخدام الطماطم الطبيعية افضل كتر من الصلصات الجاهزة المليانة مواد حافظة.

أثناء ضرب الطماطم في الخلاط ممكن نضيف لها بنجر مسلوق حيعزز اللون جدًا ويضيف فوائده الرهيبة، لأنه غني جدًا بالحديد والكاروتين.

كمان ممكن نضيف جزرة مسلوقة بنفس الطريقة، وبكده تكون الصلصة غنية جدًا.

المحشي

مين مبيحبش المحشي؟ المحشي من أكتر الوصفات الغنية بالخضروات، وممكن نحضره بطريقة صحية ودايت بسهولة.

يعني مثلًا نخلي الخضروات أكتر من الرز، ونستخدم الدهون الطبيعية الحيوانية أو السمن البلدي بدل الدهون المهدرجة والسمن المعلب.

ممكن كمان نضيف للخلطة قلب الكوسة المتبقي بعد تقويرها، بيضيف فائدة من غير تغيير الطعم.

بشر الطماطم مع بشر البصل مع بشر الكوسة، مع الخضروات الورقية (بقدونس وشبت وكسبرة)؛ كمية خضروات رائعة.  

دي كانت بعض تكاتي في المطبخ عشان أعزز لولادي فائدة الطبخ الطبيعي العادي بتاع كل يوم، وأعملهم وصفات خضار سحرية للأطفال.

شاركونا تكاتكم انتو كمان عشان ولادكم يحصوا على فوائد الخضروات.