وصفات الكوسة للرضع.. 5 وصفات سهلة ولذيذة

“الكوسة” خضار لذيذ كله فوائد؛ لكن مظلوم مع أطفال كتير، تفتكروا ممكن نعمل وصفات الكوسة للرضع بطريقة مبتكرة تحببهم فيها؟ تعالوا نشوف.

القيمة الغذائية للكوسة

كوب من الكوسة المطبوخة بحجم 223 جرام تقريبًا بيقدم لنا:

• 1 جرام بروتين.
• أقل من 1 جرام دهون.
• 3 جرام كربوهيدرات.
• 1 جرام سكر.
• 1 جرام ألياف.
• 40% من الاحتياج اليومي لفيتامين أ.
• 16% من احتياج المنجنيز.
• 14% من احتياج فيتامين c.
• وكميات من البوتاسيوم والمغنسيوم و فيتامين k ونحاس وفوسفور وثيامين.
• كميات من الليوتين والبيتاكاروتين ودي مضادات أكسدة تحافظ على خلايا الجسم. 

فوائد الكوسة للرضع

الكوسة خضار غني بالمعادن والفيتامينات اللي بيحتاجها جسم الطفل، كمان هي غنية بالألياف والماء اللي بيحلوا مشكلة الإمساك عند الرضع بشكل ممتاز وبيساعدوا عملية الهضم.

بيتاكاروتين الموجود في الكوسة بيلعب دور كبير في الحفاظ على صحة الجلد والعين وتقوية النظر.

فوائد كتير جدًا كمان للعظام والقلب ممكن ياخدها الطفل الرضيع من وجبة كوسة.

تعالوا نشوف ازاي نحضر وصفات الكوسة للرضع بطريقة مبتكرة ولذيذة.

وصفات الكوسة المهروسة

بداية دخول الطعام للطفل بتكون في شكل بيوريه مهروس، والكوسة من الحاجات القابلة جدا للدمج مع فواكه وخضروات أخرى لتحضير وجبات متكاملة.

طبعًا بنأكد على استشارة الطبيب قبل دخول أي طعام جديد للطفل.

كمان لازم نجرب كل طعام لوحده قبل خلطه مع عناصر تانية، عشان نراقب تأثير كل حاجة لوحدها على الطفل تجنبًا للحساسية.

بعد ما نتأكد أن كله تمام؛ ممكن نعمل من الكوسة أحلى ميكسات:

الكوسة المهروسة مع الجزر 

خليط كلاسيكي رائع، نقوم بتسوية شرائح الكوسة والجزر على البخار أو نسلقهم سوا؛ ونقدمهم للطفل مهروسين كويس أو مضروبين بالبلندر.

الكوسة مع التفاح 

نقشر الكوسة والتفاح ونسلقهم سوا أونبشرهم ونسويهم، وممكن نضيف الشوفان لوجبة متكاملة.

الكوسة مع الموز والمكسرات

لما النونو يكبر حبة والطبيب يأذن بدخول المكسرات ممكن نعمل ميكس لذيذ من الكوسة والموز المهروسين؛ وعليهم رشة مكسرات مطحونة كويس جدًا.

أقرأ أيضًا: تغذية الرضع في الشهر التاسع | وصفات مبتكرة لطفلك

وصفات الكوسة طعام الأصابع والطعام الصلب

لما النونو يكبر ونبدأ نقدمله طعام الأصابع من الشهر التامن تقريبًا؛ أو الطعام الصلب اللي مش مهروس؛ ممكن نقدمله الكوسه بأشكال جميلة؛ منها:

أصابع الكوسة المشوية

نقطع الكوسة شرائح أو أصابع ونقلبها في زيت زيتون ونشويها في طاسة أو جريل على البوتاجاز؛ ونضيف لها رشة لمون.

ممكن كمان نشوي معاها شرائح فلفل ألوان ونقدمهم وجبة غنية للطفل.

بان كيك الكوسة 

لما يبدأ الطفل في تناول البيض حسب توصيات الطبيب، ممكن نعمل مافن او بان كيك الكوسة الرائع بالطريقة دي:

• نبشر الكوسة، ونصفيها ونعصرها جوه فوطة معقمة.
• نخفق بيضة.
• شوية دقيق شوفان.
• نخلطهم سوا ونسويهم على طاسة بشكل بان كيك.
• أو في قوالب الكب كيك بشكل مافن.
• في السن الأكبر ممكن نضيف لبنة أو جبنة قريش لتعزيز الطعم والفائدة.

كده يكون عندنا 5 وصفات للكوسة عشان نقدمها للطفل بشكل يحبها منذ الصغر، وألف هنا وشفا للنونو.

وشاركونا إبداعاتكم في وجبات أطفالكم.

المصادر:

yummytoddlerfood

healthline

momjunction.