البطاقة الصحية كنز في إيدينا ودليل للإجابة على كل الأسئلة

كتبت: د. نفين عازر

حبايبنا بابا وماما كل اللي عندهم أطفال لسة مولودين أو في مرحلة المهد يعني الطفل أول ما يتولد لحد ما يبقى عنده سنتين طبعًا احنا أول ما بنولد طفلنا بنبقى محتارين وعندنا أسئلة كثير أمتى هيكبر؟ هيكبر أد إيه؟  أمتى يتكلم ؟ وهيمشي أمتى وإزاي ؟ وهيزحف ولا لأ؟ لكن ليه محيرين نفسكم وإحنا معانا البطاقة الصحية.

تعرفوا  إيه عن البطاقة الصحية للمواليد اللي بتاخدوها لما ابنكم أو بنتكم بيتولدوا فيها معلومات كثير عن حاجات إحنا كمان منعرفهاش زي:

الفحص قبل الجواز

• البطاقة الصحية بتعرفنا أهمية الفحص قبل الجواز لأن ده بيأثر علينا بعد كده وإذا كنا هنقدر نخلف أطفال ولا لأ والأطفال هيكونوا أسوياء ولا لأ.

صحة الأم

• فيها متابعة ماما الحامل في الطفل الثاني وبيبقى في المتابعة قياس الوزن- الضغط – السكر- تورم الرجلين – الصدر – القلب –  حركة الجنين – وضع الجنين – دقات قلب الجنين – زلال – تطعيم التيتانوس – هيموجلوبين- الجهاز البولي. 
• وخدي بالك يا ماما من التغذية السليمة وقت الحمل علشان منقعش مشاكل سوء التغذية.

صحة الطفل الجسدية

• البطاقة دي مهمة جدًا لأن فيها جدول موضح فيه إزاي الطفل بيكبر، وعند كل مرحلة بيكبر قد إيه وفيها كمان مواعيد التطعيمات، وكمان موجود جدول في النص علشان نعرف وزن الطفل طبيعي ولا لأ في كل شهر.

تطور الطفل بالصور من عندي

• أنواع التطعيمات اللي مفروض اديها لأبني ومواعيدها.
  
• بتكلمنا عن ضرورة الرضاعة الطبيعية وأهميتها بالنسبة للطفل، وإزاي بيخلي الطفل مناعته قوية. فلو سمحتي يا ماما اجتهدي إنك ترضعي طبيعي وده بيبدأ من ساعة الحمل لما الدكتور يديكي تمرينات تعمليها للثدي علشان تعرفي ترضعي طبيعي، ولما تولدي وتبدأي رضاعة لازم تأكلي كويس وتشربي ميه وسوائل كتير.
  
• في تحليل لازم نعمله وهو ((RH  وده بيبين إذا كانت فصيلة الدم للأم والأب لأن لو الأم سالب والأب مجب يبقى لازم الأم تأخد حقنة بعد ما تولد أول طفل علشان الطفل الثاني يكون سليم ويعيش من غير إعاقة، والإبرة دي بنجبها من المصل واللقاح ونديها للدكتور قبل الولادة علشان يديها للأم في أوضة العمليات بعد الولادة على طول أوعوا تنسوا.
  
  اقرأ أيضًا: وصفات الكوسة للرضع.. 5 وصفات سهلة ولذيذة
  
• وأهمية كمان إني أعمل سونار وقت الحمل علشان اطمن على نفسي وعلى الطفل اللي هولده.
  
• والمهم بقى إن فيها جدول متابعة دورية للطفل كل شهر للطول والوزن.
  
• وإذا كان عنده أمراض ولا لأ زي الإسهال المتكرر أو مشاكل في التنفس ونسبة الهيموجلوبين وهل بيستعمل ببرونة أو تتينا وماما بترضع طبيعي ولا لأ.
  
• فحص للأسنان كل شهر وبتطلع في ميعادها ولا محتاج أدوية زي الكالسيوم مثلاً.

صحة الطفل النفسية: 

• وفي كمان حاجة مهمة جدًا وهي الطريقة اللي نتعامل بيها مع ولادنا علشان يبقوا مش معقدين، وإزاي يتعاملوا كويس مع الناس لما يكبروا.