Mothers Comfort Zone Mothers Comfort Zone
التوحد… كلمة بقينا نسمعها كتير الفترة الأخيرة. بس هل ده معناه إن نسبة انتشار التوحد فعلًا زادت، ولا اللي زاد هو وعي المجتمع بيه؟
مع كثرة الحديث عن التوحد، ظهرت معاه مصطلحات جديدة بقى فيها خلط في المعاني، زي مثلًا: هل التوحد هو طيف التوحد، ولا فيه بينهم فرق؟
في المقال ده، هنوضح أمور كتير عن طيف التوحد؛ أنواعه وعلاجه وارتباطه بتأخر الكلام عند الأطفال.
الفرق بين التوحد وطيف التوحد
زمان، كان التوحد بيتعرف على إنه اضطراب في النمو العصبي بيؤثر على قدرة الطفل على تمييز الأشخاص من حوله والتعامل معاهم على المستوى الاجتماعي.
لكن في سنة ٢٠١٣، الرابطة الأمريكية للطب النفسي غيّرت مصطلح التوحد لمصطلح أشمل وبقى يطلق عليه (طيف التوحد).
وأصبح مصطلح طيف التوحد مظلة واسعة يندرج تحتها أكثر من مرض، أبرزهم:
- التوحد (Autism)
- اضطراب النمو الشامل (Pervasive Developmental Disorder)
- متلازمة أسبرجر (Asperger syndrome)
طيف التوحد البسيط
رغم إن مصطلح ( طيف التوحد البسيط ) يبدو علمي بحت، إلّا إنه الحقيقة مش مصطلح علمي ولا طبي بتاتًا.
هو مجرد تعبير عن خفة الأعراض المرتبطة بالتوحد المتعارف عليها، واللي في أغلب الأحيان بتشمل:
- صعوبة في تكوين صداقات مع الآخرين بسبب افتقاد بعض المهارات الاجتماعية.
- الصمت الانتقائي؛ بمعنى الحديث مع الأشخاص اللي بيرتاحوا ليهم فقط، وتجنب الكلام مع الغرباء واللي بيظهر بشكل ملحوظ في الأماكن العامة.
- الروتين الصارم اللي بيجد فيه المصاب راحته، وبيضمنله علاج مشكلة القلق والارتباك اللي بتحصله لو طرأ على حياته أي تغيير.
- تأخر الكلام نسبيًا مقارنة بالأطفال في نفس العمر.
طيف التوحد وتأخر الكلام
رغم إن تأخر الكلام من الأعراض الشائعة جدًا وتُعّد من أبرز أعراض التوحد؛ إلّا إن تأخر الكلام مش شرط يكون سببه التوحد.
كمان فيه اختلافات ممكن ندور عليها لو لاحظنا تأخر الكلام عند الطفل، إذا وجدناها لازم نتوجه للطبيب المختص اللي بدوره هيوجهنا لإجراء اختبارات النمو. اختبارات النمو بتساعد الطبيب يحدد إذا كان فيه تأخر فعلًا في المهارات الإدراكية والاجتماعية ومهارات اللغة عند الطفل ولا لأ.
أبرز الاختلافات عند طفل التوحد:
- عدم تعبيره عن سعادته بابتسامة لحد الشهر السادس.
- مش بيقلد الأصوات اللي بيسمعها أو تعبيرات الوجه اللي بيشوفها لحد الشهر التاسع.
- مبيصدرش أي صوت لحد وصوله عمر السنة.
- الاستجابة البطيئة للطفل عند مناداته باسمه.
- تكرار كلمات مفردة معينة حتى لو مش في سياق الموقف وعدم القدرة على تكوين جملة.
اقرأ أيضًا:
هل يشفى الطفل من طيف التوحد؟
بالرغم من التقدم الطبي الملحوظ، إلّا إن التقدم ده موصلش -حتى الآن- لدواء يشفي التوحد بشكل تام.
الأدوية اللي اتوصل ليها المختصين معظمها بتدور حول السيطرة على الأعراض.
لكن، خلينا نفكر سوا: إيه الهدف اللي محتاجين نوصله من علاج التوحد؟
الهدف الأكبر هو تنمية المهارات الاجتماعية والتواصل ودعم النمو والقدرة على التعلم.
وده بالظبط اللي دفع المختصين لطرح الخيارات الآتية لعلاج التوحد.
علاج طيف التوحد
- العلاج المعرفي السلوكي اللي ببساطة بيساعد في التغلب على القلق والتحديات العاطفية المختلفة اللي بتواجه طفل التوحد واللي أثبتت دراسة حديثة جدارته وفعاليته.
- العلاج التربوي، اللي بيحدده الطبيب المختص وبيتميز بدرجة عالية من التنظيم تساعد الطفل على تنمية مهاراته الاجتماعية ومهارات التواصل المختلقة.
- العلاج الأسري، اللي فيه بيتعلم أفراد الأسرة بعض المهارات والألعاب المختلفة اللي بتساعد في علاج المشكلات السلوكية عند طفل التوحد.
- العلاج اللغوي اللي بيهتم بتحسين مهارات التحدث عند طفل التوحد.
أخيرًا
الشفاء من طيف التوحد مش بعصا سحرية، لكن بالتسلح بالمعلومات الطبية الكافية ومتابعة نتائج الدراسات الحديثة اللي بتكشفلنا كل يوم مفاتيح جديدة نقدر نستغلها ونوظفها لعلاج التوحد.
المصادر
