Mothers Comfort Zone Mothers Comfort Zone
تأخر الكلام عند طفل التوحد من الموضوعات اللي بتشغل امهات كتير، هل تأخر الكلام علامة عالتوحد ولا لأ؟ طب هل كل متوحد عنده تأخر في الكلام؟
تابعوا المقال للأخر.
الكلام هو وسيلة التواصل الأولى عند بني الإنسان، مع مرور الأيام والطفل يكبر بيبقى عايز حاجة معينة او عايز يلفت انتباه اللي حواليه ف بيبتدي يعمل حركات معينة زي انه يشاور او يشدك من إيدك أو بيصلك في عينيك.
الأطفال أذكياء جدًا مع أول كلمة بينطقها حتى لو ملغبطة ومش مفهومة وبيلاقي رد فعل لطيف عليها من اللي حواليه بيعرف ان كدة بيلفت الانتباه أكثر وبيلاقي رد فعل إيجابي زي انك تحضنه أو تسقفله او تفرح لسماعك كلامه، فبينمي الوسيلة دي.
بيبتدي يطول في الكلمة، يعملها نغمة مختلفة، يرددها كتير وكل مدى بيلاقي رد فعل إيجابي عليها بيزوّد ويخترع كلمة مختلفة.
امتى يعتبر الطفل تأخر في الكلام؟
الطفل بيبتدي يلقط ويرددها كلمات بسيطة من عمر ١٠ شهور ل ١٥ شهر، أغلب الأطفال بيبتدي عند عمر سنة.
لما الطفل يتم سنتين فأكثر ومفيش كلمات واضحة يقدر يقولها هنا نقدر نعرضه على أخصائي.
يفحص الأخصائي اكتمال التكوين الداخلي للفم واللسان وفحص السمع -على الرغم ان الفحص ده بيتعمل بعد ولادة الطفل حتى عمر ٢٨ يوم في الوحدة الصحية عند تسجيل الطفل- لاستبعاد أي مشكلة عضوية.
إيه أسباب تأخر الكلام؟
لو جينا دورنا على بداية موضوع تأخر الكلام هنلاقي إن ليه اسباب كتير عند الطفل نفسه أو له علاقة بالبيئة المحيطة بالطفل.
يعني في أطفال بيكون عندهم تأخر كلام نتيجة عدم اختلاطهم بأطفال ثانية في سنهم أو بسبب انشغال الأب والأم عنهم وان مش بيرددوا الكلام ادامهم كمان بسبب ان الطفل يفضل ساعات طويلة بيشوف آيباد أو تلفزيون.
سمعت قبل كدة عن اللا أدائية؟
إيه الكلمة الثقيلة دي؟ هبسطهالك .. (اللا أدائية) معناها إن الكلام بيلاقي صعوبة انه يتترجم على لسان الطفل.
لسة صعبة؟ نقول تاني لو الكلمة بتكون رسالة من المخ أو من مركز الكلام في المخ اللسان عشان يعبر عنها، في حالة (اللا أدائية) الرسالة دي مش بتترجم على اللسان فالطفل بيلاقي صعوبة انه يقول الكلمة.
تكون هنا شكوى الأم للمختص إن الطفل عايز يتكلم ولسانه “متلجم” أو الكلمة على لسانه بس مش عارف يقولها.
طب سمعت عن الصدى اللفظي؟
دي درجه من درجات تأخر الكلام بيردد فيها الطفل جملة معينة بشكل متكرر عن العادي.
اقرأ أيضًا: تأخر ظهور الأسنان عند الأطفال أسبابه ومضاعفاته
التوحد وتأخر الكلام
أغلب الأطفال المسجلين حالات توحد عندهم تأخر كلام يرجع لعوامل مختلفة ان طفل التوحد بيكون عنده ضعف في التواصل مع الآخرين بجانب ان عنده بيئة خاصة بيه مش بيشاركها مع حد تاني.
لكن ده ميمنعش ان في اطفال عندهم تأخر في الكلام ومش عندهم توحد.
في حالات عضوية لتأخر الكلام زي ان الطفل يكون عنده مشاكل في السمع وزي ماحنا عارفين ان الطفل بيبدأ الكلام لما يتردد قصاده ، فبالتالي الأطفال ضعاف السمع عندهم تأخر في الكلام.
إيه علاقة التوحد بتأخر النطق عند الأطفال؟
يعتبر تأخر الكلام عند طفل التوحد علامة مميزة لحالته، بمعنى ان دي بتكون اكتر حاجة بتلفت انتباه الأهل ان الطفل لازم يشوف مختص.
لو جينا بصينا للموضوع من ناحية مختلفة طفل التوحد عايش في عالم خاص بيه مش بيتعامل مع البيئة المحيطة، عازل نفسه بين اللعب وعنده صعوبة انه ينتبه للي حواليه اكثر من ثواني يبقى هيتكلم بشكل طبيعي إزاي؟
على الرغم من اللي قولته إلا إن تأخر الكلام عند طفل التوحد مش معناه انه مش عارف كلمات.. بالعكس طفل التوحد بيكون عنده كلمات حافظها وبيرددها لنفسه بس مش بيستخدمها كوسيلة تواصل.
بتكمن صعوبة الموضوع كله في لفت انتباه الطفل للحوار وانك تخرجه للبيئة المحيطة وتخليه يتواصل.
هل طفل التوحد يفهم الكلام؟
تأخر الكلام عند طفل التوحد مش بالضرورة معناه انه مش بيفهمه، طفل التوحد بيلاقي صعوبة انه يتواصل بس يقدر يفهم الكلام بصورة طبيعية.
ختامًا تأخر الكلام عند طفل التوحد مش دليل مرضي ابدًا، على العكس نقدر ننمي الكلام عند طفل التوحد وأكيد كلما كان التدخل السريع مع الأخصائي أسرع كلما كان أسهل.
المصادر
https://www.nhs.uk/conditions/autism/what-is-autism/
https://otsimo.com/en/help-nonverbal-child-speak/
https://www.chop.edu/conditions-diseases/childhood-apraxia-speech
http://www.timeforafuture.com.au/fact_sheets/early_features.htm
https://www.verywellhealth.com/is-late-speech-a-sign-of-autism-259888