Mothers Comfort Zone Mothers Comfort Zone
طفل في مكان عام قاعد على الأرض عمال يصرخ من الغضب… سلوكه عدواني جدًا مع أي حد يقرب منه ومحدش عارف يتصرف معاه!
كام مرة شوفنا حالات زي دي؟ طب كام مرة لقينا رد فعل عصبي جدًا من الأم؟.. نوبات الغضب حاجة شائعة جدًا، مش بس في الأطفال لكن كمان في الكبار.
نوبات الغضب عند الأطفال بالذات التوحديين بتؤرق أمهات كتير وبتخليهم مش واثقين إذا كانت طريقتهم في تربية أطفالهم هي اللي اتسببت في السلوك ده.
وعشان نقدر نسيطر على نوبات غضب طفل التوحد، محتاجين نعرف بعض الحاجات. إيه أسباب نوبات الغضب دي؟ ليه طفلي بيلجأ للسلوك ده بالذات؟ هل فيه علاج يساعد طفلي ويقلل من حدة النوبات دي؟
عنف الطفل التوحدي
العنف والغضب عند طفل التوحد بشكل عام هو سلوك عدواني ممكن يسبب أذى سواء للشخص العنيف أو اللي حواليه. العنف له صور كتير، منها:
- العنف اللفظي: زي تهديد الآخرين أو شتم الآخرين ونعتهم بألفاظ غير لائقة.
- العنف الجسدي: زي الضرب أو العض أو رمي الآخرين بأي شئ.
أثبتت الدراسات الحديثة إن معدلات نوبات الغضب عند طفل التوحد أعلى من أقرانه اللي من نفس العمر والسلوك ده إما بيكون موجه للأهل أو للأشخاص الجدد اللي بيتعامل معاهم طفل التوحد.
اقرأ أيضًا: دمج التوحد وتأثيره على الصحة العقلية؟!
أسباب غضب طفل التوحد
عشان نقدر نحدد طريقة التعامل الصحيحة مع نوبات غضب طفل التوحد، لازم الأول نعرف إيه أسبابها؟ إيه اللي بيدفع طفل التوحد إنه يتبع السلوك العدواني ده؟
طفل التوحد بيعاني صعوبة في اكتساب المهارات الاجتماعية والسلوكية، وده بيخليه مش قادر يعبر بشكل كويس عن شعوره. فممكن تلاقيه بيستجيب لبعض المواقف الاجتماعية بنوبات غضب عنيفة؛ لأنه ببساطة ممكن يكون:
- منزعج من عدم قدرته على فهم كل الأحداث أو الكلام اللي بيدور بين الأشخاص اللي حواليه.
- مش عارف يعبر عن ألم عضوي حاسس بيه.
- مش متقبل تغيير مفاجئ حصل في روتين حياته اللي متعود عليه.
التعامل مع نوبات غضب طفل التوحد
السيطرة على نوبات غضب طفل التوحد محتاج تعاون بين الأهل ومقدم الرعاية الصحية المختص، محتاج التزام بخطة صريحة واللي في أغلب الأحيان بتتكون من ٤ مراحل:
مرحلة التحديد
في المرحلة دي، بنركز كويس مع الطفل عشان نحدد الآتي:
- إيه المواقف اللي بتدفع الطفل للسلوك العدواني؟
- إيه نوع العنف اللي الطفل لجأ له؟ هل لجأ للعنف اللفظي ولا الجسدي ولا أي نوع آخر؟
- هل نوبات الغضب دي مرتبطة بمكان معين أو شخص معين؟
- إيه معدل نوبات الغضب؟
مرحلة الفهم
الهدف الأساسي من المرحلة دي هو فهم الهدف اللي كان الطفل بيحاول يوصله من السلوك العدواني وده بيكون عن طريق الملاحظة الدقيقة لسلوك الطفل.
هل مثلًا بيحاول يقولك إنه رافض شئ معين انتِ بتعمليه؟ هل بيحاول يوصل للمدرس إن الواجب المنزلي مرهق وشاق جدًا عليه؟
فهم الهدف الأساسي اللي الطفل بيحاول يوصله هيسهل جدًا مهمة الوصول لأمثل طريقة للتعامل مع نوبات الغضب.
مرحلة الإدارة
بعد ما حددنا وفهمنا كويس دوافع الطفل للسلوك العدواني، جه وقت السيطرة على نوبات غضب طفل التوحد.
الدراسات الحديثة بتثبت إن اتباع طريقة (تحليل السلوك التطبيقي) (ABA) فعّال جدًا في مساعدة طفل التوحد لاستبدال السلوك العدواني بطرق جديدة للتعبير عن ذاته. وبالتالي، يقل معدل نوبات الغضب وميحتاجش يلجأ لأي صورة من صور العنف عشان يوصل إحساسه أو يعبر عن انزعاجه من أي شئ.
مرحلة الوقاية
أخيرًا وليس آخرًا، مرحلة الوقاية من نوبات الغضب عند طفل التوحد. في المرحلة دي، بنحاول نوفر بيئة هادية لطفل التوحد، ميكونش فيها أي تغيرات مفاجأة تزعجه أو تدفعه للجوء لنوبات الغضب مرة تانية.
في المرحلة دي كمان بنحاول نكافئ الطفل عند سيطرته على أحاسيسه وتعامله مع المواقف بشكل أفضل؛ لأن ده معناه إن الطفل بدأ بالفعل يكتسب مهارات اجتماعية وسلوكية جديدة.
علاج نوبات غضب طفل التوحد
في بعض الحالات، نوبات الغضب مش بس بتكون بسبب انزعاج الطفل من موقف اجتماعي، لكن ممكن تكون بسبب طبي يستدعي تدخل دوائي بيحدده الطبيب المعالج.
ومن أبرز الأدوية المتصدرة حاليًا في علاج نوبات الغضب عند طفل التوحد هي الجيل الثاني من مضادات الذهان (Second-generation antipsychotics) واللي أظهرت فعاليتها خلال السنين الماضية.
أخيرًا
التعامل مع نوبات غضب طفل التوحد مهمة محتاجة فهم وتخطيط كويس والتزام بخطة الطبيب المعالج عشان الطفل يقدر يكتسب المهارات الاجتماعية اللي محتاجها للتعامل مع مواقف الحياة المختلفة.
المصادر