Mothers Comfort Zone Mothers Comfort Zone
شهر أكتوبر هو شهر التوعية بمتلازمة داون.. ملاك صغير على الأرض، أفعال عفوية وحب وحنان غير مشروط، ومع ذلك بيتعرض للتنمر والرفض المجتمعي.
كمّل المقال عشان تعرف أكتر عن المتلازمة و إزاي تحمي طفلك من التنمر.
إزاي بتحصل متلازمة داون؟
كل طفل بياخد من أمه ٢٣ كروموسوم ومن الأب ٢٣ كروموسوم عشان يكون العدد الكلي ٤٦ كروموسوم.
طب ايه الكروموسومات؟ دي اللي بتشيل الچينات الوراثية اللي مسؤولة عن الصفات زي لون العين والشعر.
في حالة داون بيكون في كروموسوم زياده يعني ٣ كروموسوم لرقم ٢١.
هل متلازمة داون مرض وراثي؟
الإجابة للأسف أيوة، بتزيد نسبة أنك تنجب طفل مصاب لو في أحد الأقارب عنده متلازمة داون.
منقدرش نقول إن ده العامل الوحيد، لكن ممكن نضعه في قائمة أسباب المتلازمة.
أنواع متلازمة داون
بتتقسم داون إلى ٣ أنواع كلهم بيطلعوا في الأخر طفل داون لكل بدرجات مختلفة.
أول نوع المنتشر بين أطفال داون أن الخلايا كلها بيكون فيها الكروموسوم الزائد.
تاني نوع بيكون بعض الخلايا فيها الكروموسوم الزائد.
تالت نوع بيكون الكروموسوم الزائد مرتبط بكروموسوم تاني غير كروموسوم ٢١.
اقرأ أيضًا: فوائد السباحة لأطفال التوحد .. علاج وتنمية مهارات
هل أقدر أعرف لو الجنين مصاب أو لا وأنا حامل؟
تقدري تعرفي لو كان الطفل بنسبة كبيرة عنده المتلازمة من خلال أشعة الـ4D، بيكون في سائل زيادة حوالين رقبة الطفل وده معناه خلل چيني، بتبان في الأشعة من الأسبوع الـ ١٥ للأسبوع ٢٠.
كمان في تحاليل بتتعمل ولكن مش كل الدكاترة بيفضلوها زي فحص السائل الأمنيوسي.
صفات طفل داون
بنشوف أطفال داون ليهم شكل متشابه زي
- وجه مسطح.
- رقبة قصيرة.
- رأس صغيرة نسبيًا.
- عيون واسعة.
- لسان عريض.
كمان بيعاني أطفال داون من أمراض بتكون ملازمة طول عمرهم زي
- ضعف النظر.
- وهن في العضلات.
- مناعة الجسم قليلة فبيكونوا عرضة للإصابة بأمراض الجهاز التنفسي.
- أمراض القلب ودي بتبان منذ الولادة.
هل مريض متلازمة داون يقدر يخلف؟
من ضمن معلومات مغلوطة كتير عن متلازمة داون كان بيعتقدإن المريض مبيخلفش، لكن ده مش صح.
لكن الحقيقة إنه يقدر يخلف عادي وكمان يقدر يخلف طفل طبيعي.
إزاي أقول لطفل متلازمة داون أنه مختلف؟
الأطفال كلهم مختلفين بدرجات، لكن بيتجمعوا على حب الاستكشاف واللعب والمشاركة.
نقدر نوصل للطفل إنه مميز واختلافه شئ جميل وإن في أطفال مختلفين كتير لكنهم مميزين.
نشجع الطفل عن طريق دمجه في مدارس ومش مجرد تعليم منزلي عشان يشوف أطفال زيه عندهم نفس الإصابة وعايشين بشكل طبيعي.
إزاي ادمج الطفل في المجتمع؟
بيعاني أهل طفل متلازمة داون من طريقة تفكير البعض، زي أنهم يتجنبوا التعامل مع الطفل وبيخافوا يلعب مع أولادهم.
كمان الحرص الزائد من أهل الطفل وخوفهم عليه بيؤدي لحرمانه من اللعب والمشاركة مع الأطفال وده أكيد مش صح.
من هنا كواجب مجتمعي الناس تقدر إن طفل داون حالة مختلفة ومش مريض وأكيد مرضه مش معدي.
دمج الطفل واني اشجعه يتعامل مع أطفال تانيين ويلعب معاهم شئ مهم، لأن عزله بيحسسه بعجزه وإن اختلافه شئ غير مرغوب فيه ومنبوذ.
دور الدولة المصرية لدعم أفراد متلازمة داون
في الفترة الأخيرة دعمتهم الدولة المصرية وبقى ليهم مكان للعمل في أوساط ومجالات كتير، زي المذيعة رحمة خالد أول مذيعة بمتلازمة داون في مصر.
كمان ليها مشاركات كتيرة في أنواع مختلفة من الرياضات وحصلت على ميداليات.
بالإضافة لكدة المشخصون بمتلازمة داون بيشتغلوا في مجالات كتيرة بصورة طبيعية وبيقدروا يفتحوا عمل خاص بيهم و يديروه بكفاءة زي أي شخص.
ختامًا، الدعم النفسي لأهل الأطفال ضرورية جدًا، بسبب الحالة الجديدة والتحديات اللي بتمر بيها مع طفلها كمان طفل متلازمة داون مش مدعاة خوف وقلق من اللي حولها.