Mothers Comfort Zone Mothers Comfort Zone
“السباحة للجميع” كلمة دايمًا بتتردد في دماغي وانا قاعدة مع ولادي في تمرين السباحة؛ كنت باعمل بحث عن التوحد وإمكانية علاجه، لقيت فوائد السباحة لأطفال التوحد عظيمة جدًا!
كمية مهارات مش طبيعية في تمرين السباحة، حسيت اني منبهرة قلت احكيلكم لقيت إيه في البحث.
فوائد السباحة لأطفال التوحد
السباحة مش بس حركات رياضية، السباحة تأمل وتعامل مع الماء (أصل الحياة)، يعني استرخاء وراحة أعصاب.
وكمان تمرين أمان، مفيش احتمالات وقوع أو جروح أو خبطات، هي مشكلتها الغرق لكن مع وجود مدرب ملاصق للطفل نقدر نتغلب على المشكلة دي.
بالعكس تمامًا؛ الأبحاث أثبتت أن رياضة السباحة بتساهم بشكل كبير في وقاية أطفال التوحد من الغرق، لأنها بتكسبهم مهارات التعامل مع الماء القدرة على رفع الجسم والحفاظ على ثباته في الماء بدون خوف.
السباحة كمان بتعلي جدًا من ثقة طفل التوحد في نفسه، وتكسبه احترام الذات ومهارات التواصل مع الآخرين، ده غير أنها بتساعد طفل التوحد على تنظيم تنفسه وتهدئة أعصابه، وبالتالي تعالج أصعب عرض للتوحد وهو “نوبات الغضب والقلق“.
أثناء التمرين الطفل بيتعود كمان على الاستجابة لطلبات المدرب والتفاعل معاها بشكل يخليه يطور من مهارات التواصل الاجتماعي.
السباحة كمان والوجود في الماء من أعظم الحاجات اللي بتساعد الطفل عامة يتغلب على مشاعر الخوف وتكسبه الجرأة.
لان الماء عالم غريب بالنسبة للطفل، وتمرين السباحة بيزيل الخوف ده تدريجيًا، ده غير طبعًا اللياقة البدنية وتقوية العضلات، وتجنب السمنة وتنظيم الشهية.
فوائد كتير جدا أدت أن الأطباء يبدأوا يرشحوا “العلاج المائي لأطفال التوحد” في بروتوكولات العلاج.
اقرأ أيضًا: السباحة للاطفال | 3 نصائح لا تغفلها قبل التمرين
العلاج المائي لأطفال التوحد
يعتبر العلاج المائي من احسن الطرق اللي بتساهم في تطوير مهارات طفل التوحد وعلاج بعض الأعراض في نفس الوقت.
العلاج المائي بيساعد أطفال التوحد في تطوير قوتهم العضلية وقدرتهم على التحمل، كمان بيشجع الطفل على الانخراط في أنشطة اجتماعية تانية.
طفل التوحد كمان من أكبر مشاكله أنه بيدي ردود أفعال مش طبيعية تجاه المؤثرات الحسية، يعني إما انه يتعصب بزيادة بسبب مؤثر عادي زي الصوت والضوء والملمس.
أو انه ما يديش الاستجابة المطلوبة منه أصلا تجاه الأشياء، وهنا العلاج المائي بيساهم بشكل كبير في تهدئة أعصابه ومساعدته في التعرف على البيئة المحيطة بشكل هادي.
ويزود وعيه بحدود جسمه لانه غمر جسمه بالماء بيعرضه لتجربة حسية فريدة، والضغط الهيدروستاتيكي للماء له تأثير كبير كمهدئ للأعصاب، يعني مجرد ضبط درجة حرارة المياه والسيطرة على المشتتات التانية زي الأضواء والدوشة، حيخلي السباحة لها تأثير السحر في علاج اضرابات طيف التوحد.
العلاج المائي لأطفال التوحد كمان بيساعدهم على تطوير مستواهم الدراسي وزيادة درجات تركيزهم واستيعابهم نتيجة تهدئة أعصابهم أثناء التمرين؛ اللي بيساعدهم على تطوير مهاراتهم العقلية والاستجابة للمعلمين.
نفخ الفقاعات وتنظيم النفس أثناء تمرين السباحة بيساهم بشكل رائع في تنمية المهارات اللغوية وعلاج مشاكل التخاطب وتطوير الكلام.
السباحة والعلاج المائي كمان من أحسن وسائل دمج أطفال التوحد في المجتمع، تعالوا نشوف ازاي.
اندماج التوحدي عن طريق السباحة
تمرين السباحة بيوفر بيئة مريحة لطفل التوحد، يقدر يتعلم من خلالها مشاركة الآخرين، والتنافس البسيط والمشاركة في الادوات المسموح مشاركتها مثلا.
التعامل مع الآخرين واللعب أثناء تدريب السباحة بيعلي جدا من ثقة الطفل في نفسه ويخليه يشعر بالانجاز ويحترم ذاته، وده بيشجعه على الانخراط في أنشطة اجتماعية تانية والنجاح فيها.
مهارات التواصل بالعين (Eye contact) بتتطور جدا بالعلاج المائي، وكمان مهارات التفاوض والتعبير عن الذات.
التعامل مع زملاء ومدربين أثناء التمرين كمان بيقلل جدا السلوك المنعزل أو العدائي لبعض مصابي التوحد، وبالتالي يساعد على دمج أطفال التوحد في المجتمع.
فوايد ملهاش حصر تقدر تحصل عليها من ممارسة السباحة العلاجية لأطفال توحد، شاركونا تجاربكم وعملتو إيه لمساعدة أطفالكم على تخطي صعاب التوحد.
وخلينا نأكد ان الطفل التوحدي من حقه انه يكون مش وحيد، ويمارس حياته بأكتر طريقة طبيعية ممكنة.