Mothers Comfort Zone Mothers Comfort Zone
سرطان الثدي هو ثاني أكثر أنواع السرطان شيوعًا بين السيدات، واللي للأسف مش في كل الحالات بيظهر أعراض واضحة غير في الحالات المتقدمة.
يوم واحد ممكن يغير حياة عيلة كاملة.. يوم واحد ممكن يحدد مسار حياتك!
عشان كده التشخيص المبكر لسرطان الثدي مبقاش رفاهية، ده أصبح ضرورة حتمية لازم كلنا نتبعها عشان نحافظ على حياتنا وحياة كل اللي حوالينا.
أهمية التشخيص المبكر لسرطان الثدي
الهدف الأساسي من فحوصات الثدي هو اكتشاف حالات سرطان الثدي اللي لسه مظهرش عليها أعراض واضحة، واللي بدوره بيرفع نسب الشفاء وبيقينا الحاجة للجوء لطرق العلاج المكثفة اللي ممكن تؤثر بشكل سلبي على حياة كل ست خلال فترة العلاج.
وبالرغم إن فحوصات الثدي مش بتوفر وقاية من حدوث السرطان، إلا إن التشخيص المبكر خطوة مهمة مينفعش نهملها؛ لأنها بتأثر على مسار المرض بشكل كبير.
تحديد مرحلة سرطان الثدي
تحديد مرحلة السرطان هو العامل الرئيسي اللي بيحدد طرق العلاج المتاحة وبيخلي رحلة العلاج أسهل كتير.
تقسيم مراحل تطور سرطان الثدي بيتم وفقًا لمعايير كتير، منها:
- حجم الورم.
- انتشار الخلايا السرطانية للعقد الليمفاوية.
- انتشار الخلايا السرطانية في أماكن أخرى من الجسم.
على أساس المعايير دي، بيتقسم تطور سرطان الثدي ل ٥ مراحل، هما:
المرحلة (0)
فيها بتكون الخلايا السرطانية مقتصرة على أنسجة وقنوات الثدي من غير ما تنتشر في أي مكان تاني في الجسم.
المرحلة (I)
فيها بتبدأ الخلايا السرطانية في الانتشار، لكنها بتكون بالقرب من المكان الرئيسي اللي نشأت فيه من البداية.
المرحلة (II)
فيها بتستمر الخلايا السرطانية في الانتشار، وممكن توصل للعقد الليمفاوية.
المرحلة (III)
في المرحلة دي، الخلايا السرطانية بتسمر في الغزو وبتوصل لعدد أكبر من العقد الليمفاوية.
المرحلة (IV)
ودي أخطر مرحلة من مراحل سرطان الثدي؛ لأن فيها بيرسل الورم الرئيسي ثانويات سرطانية لأعضاء الجسم الأخرى، زي الرئة والعظام
والكبد.
اقرأ أيضًا: اللولب الرحمي | أكثر وسائل منع الحمل أمانًا، ولكن!
طرق التشخيص المبكر لسرطان الثدي
التشخيص المبكر لسرطان الثدي طرقه كتير، بدءًا من الفحص الذاتي في المنزل ووصولًا لأخذ عينة خاصة للتأكد من مصدر الخلايا.
أبرز الطرق المتبعة للتشخيص المبكر لسرطان الثدي هي:
الفحص اليدوي للثدي
الفحص اليدوي للثدي إما بيكون ذاتي أو بيكون بواسطة الطبيب المختص.
لازم ننتبه إن الفحص الذاتي للثدي مش بديل لفحص الطبيب ومبيغنيش عن الفحوصات الأخرى اللي بيطلبها الطبيب المختص زي ال(ماموجرام) وغيره من الفحوصات الأخرى.
الفحص الذاتي مجرد وسيلة بتساعدك تتعرفي أكتر على جسمك، وبالتالي بتساعدك تحددي إذا حصل أي تغيير في شكل أو حجم الثدي عن الطبيعي.
الموجات فوق الصوتية (Ultrasound)
الهدف الأساسي من استخدام الموجات فوق الصوتية هو تحديد نسيج أي كتلة جديدة في نسيج الثدي، إما تكون صلبة أو مملوءة بالسوائل.
فحص الرنين المغناطيسي (MRI)
الرنين المغناطيسي وسيلة من وسائل فحص الثدي، وبتتميز بعدم استخدام أي طاقة إشعاعية خلال الفحص.
فحص التصوير الشعاعي (الماموجرام)
هو نوع خاص من الأشعة السينية (X-ray) بيستخدم بشكل كبير حاليًا في فحص سرطان الثدي، وبيوجه الطبيب للخطوة التالية زي أخذ عينة من خلايا الثدي للتأكد من أي أمر شك فيه من الأشعة.
أخذ عينة من خلايا الثدي
هي الوسيلة الوحيدة القطعية اللي يقدر يجزم بيها الطبيب إذا كانت الخلايا النامية دي سرطانية ولا لا. وعلى نتيجة العينة دي، الطبيب بيحدد طرق العلاج المتاحة وبيضع خطة العلاج المناسبة.
أماكن فحص سرطان الثدي في مصر
أماكن كتير في مصر بتوفر فحوصات الثدي بشكل مجاني، أبرزها:
- حملة ١٠٠ مليون صحة
- مستشفى بهية، أول مستشفى مصرية متخصصة لسرطان الثدي.
- المعهد القومي للأورام.
- المؤسسة المصرية لمكافحة سرطان الثدي.
أخيرًا
التشخيص المبكر لسرطان الثدي هو طوق النجاة؛ لأنه قادر بشكل ملحوظ يؤثر على مسار العلاج ويرفع نسب الشفاء. ابدأي بنفسك ووعي اللي حواليكي بضرورة فحوصات الثدي عشان تحافظي على نفسك وأسرتك.
المصادر