أعراض سرطان الثدي.. متهمليش الإشارات!

مع انتشار سرطان الثدي بشكل ملحوظ حوالينا، جه دورنا إننا نعرف أكتر عن المرض عشان نقدر نشخصه ونبدأ رحلة العلاج من بدري.

نقطة البداية لكل ده هي معرفتنا بالأعراض المصاحبة لسرطان الثدي.

الحقيقة إن أعراض سرطان الثدي مختلفة من شخص للتاني. كمان الورم ممكن ينمو بشكل كبير جدا قبل ما تظهر أعراض واضحة على الشخص. لكن، ده ميمنعش إن فيه إشارات واضحة لو لاحظنا وجودها لازم نتوجه للطبيب المختص عشان نطمن على نفسنا.

طب ازاي اقدر اعرف الأعراض دي؟ الأول لازم نعرف شكل الثدي الطبيعي وكمان لازم نعرف إن فيه تغيرات طبيعية ممكن تحصل فيه على مدار حياتنا ومتكونش تغيرات سرطانية.

شكل الثدي الطبيعي

مفيش شكل ثابت للثدي الطبيعي، لكن فيه بعض الأنماط المعروفة لكل سيدة. وبناء على ده، لازم تلاحظي أي اختلاف غير المعتاد سواء في:

شكل الثدي.
حجم الثدي؛ إما بالتورم أو ظهور أي كتل.
الحلمة؛ بتغير لونها أو ظهور بعض الإفرازات أو تغير شكلها.
جلد الثدي؛ سواء بالاحمرار أو بتغير شكله وتجعده.

التغيرات دي مش مؤشر صريح لوجود ورم، لكن وجودها لازم يخلينا نتوجه للطبيب عشان يقدر يحدد سببها وبالتالي خطة العلاج المناسبة.

اقرأ أيضًا: سرطان الأطفال حديثي الولادة.. أنواعه وأعراضه

أعراض سرطان الثدي للمرضعة

لأن بيحصل تغيرات كتير لشكل وحجم الثدي خلال الرضاعة، بيبقى صعب على الأم تحدد التغيرات الطبيعية من التغيرات غير الطبيعية.

بشكل عام، ظهور كتل في الثدي ممكن يكون له أسباب كتير، زي خراج الثدي أو التهابات أو ورم غدي ليفي، لكنه كمان ممكن يكون بسبب نمو سرطاني.

دي بعض الأعراض اللي ممكن تصاحب النمو السرطاني في الثدي -لكنها مش دليل مؤكد لوجوده-:

احمرار أو اسمرار الثدي بشكل ملحوظ.
ألم الثدي المستمر.
الحكة وتهيج جلد الحلمة.
تورم وسخونة الثدي.

أعراض ورم الثدي الحميد

أورام الثدي الحميدة من أكثر أنواع الأورام انتشارًا، ومن أبرز أعراض الأورام دي:

ظهور كتلة في الثدي أو الإبط، الكتلة دي في الأغلب بتكون:

نسيجها مختلف عن الأنسجة المحيطة.
مؤلمة خصوصًا عند اقتراب موعد الدورة الشهرية، لكن ده مش شرط لأن في بعض الحالات بتكون الكتل دي غير مؤلمة.
شكلها منتظم.
بتتحرك تحت الجلد عند تحسسها.
حدودها واضحة.

إفرازات الحلمة

الإفرازات دي ممكن يكون لونها أبيض أو أصفر، وممكن كمان تكون رقيقة أو سميكة باختلاف المسببات.

الحلمة المقلوبة أو المتقشرة

وده بيكون بسبب تغير الخلايا الموجودة وراء الحلمة واللي بيؤدي لتغير شكلها.

تقشر جلد الثدي أو تجعده

أعراض سرطان الثدي الخبيث

سرطان الثدي الخبيث أعراضه مش مختلفة كتير عن باقي الأنواع، لكن الكتلة الظاهرة في الأغلب بيكون ليها بعض الصفات، زي:

عدم انتظام شكلها.
صعوبة تحريك الكتلة دي عند تحسسها.
حدودها غير واضحة.
غير مؤلمة، لكن ده مش مؤشر إذا كان الورم حميد ولا خبيث.

سرطان الثدي الالتهابي

سرطان الثدي الالتهابي نوع نادر من سرطان الثدي الخبيث. لكن، برغم ندرته هو سرطان عنيف بينمو بسرعة.

أعراض سرطان الثدي الالتهابي بتتميز بالتورم السريع اللي بيؤدي لزيادة حجم الثدي بشكل ملحوظ والاحمرار اللي بيشمل ثلث مساحة الثدي أو أكثر.

كمان الجلد ممكن شكله يختلف ويظهرمجعد كأن فيه نقط وبيطلق على الشكل ده (جلد البرتقال) أو (Peau d’orange)

شكل الجلد المميز ده بيكون بسبب غزو الخلايا السرطانية للأوعية الليمفاوية وبالتالي بتسدها وتؤدي لتراكم السوائل تحت الجلد.

أخيرًا

أعراض سرطان الثدي مش ثابتة من شخص للتاني ومفيش منها ما يؤكد إن ده نمو سرطاني غير بعد إجراء الفحوصات اللازمة؛ وده بسبب تداخل الأعراض دي مع أمراض تانية كتير. لو لاحظتِ أي تغيير في شكل أو حجم الثدي-حتى لو بسيط-، توجهي للطبيب المختص عشان تطمني.

المصادر