Mothers Comfort Zone Mothers Comfort Zone
يا ترى حياتي هترجع طبيعية تاني؟ هقدر أقف على رجلي من تاني ولا لا؟
أسئلة كتير وأفكار ملهاش آخر بتبقى أول رد فعل بعد التشخيص المبدئي بسرطان الثدي.
ستات كتير بتستسلم وتفقد الأمل من البداية، ستات كتير بتفتكر إن هي دي النهاية..
رحلة علاج سرطان الثدي بتبدأ بيكي انتي، بتبدأ من يقينك أنك بطلة وهتقدري.. بتبدأ من وعيك وسعيك إنك تعرفي كل خيارات العلاج المتاحة وتتناقشي مع طبيبك الخاص فيها لحد ما توصلي للخطة المناسبة.
الجراحة لعلاج سرطان الثدي
جراحة سرطان الثدي من أكثر الخيارات المتبعة في وقتنا الحالي، واللي ممكن تشمل إجراءات مختلفة باختلاف انتشار السرطان ورأي الطبيب المعالج. الإجراءات دي زي:
- استئصال الورم؛ فيه بيستأصل الجراح الخلايا السرطانية مع جزء بسيط من أنسجة الثدي السليمة اللي حواليها. الإجراء ده مناسب لو حجم الورم صغير نسبيًأ. لكن، لو حجم الورم كان أكبر، في الغالب بيوصي الطبيب المعالج بالخضوع للعلاج الكيميائي قبل جراحة الثدي؛ عشان يسيطر على حجم الورم ويساعد على ازالته بشكل أسهل خلال الجراحة.
- استئصال الثدي كله، بما فيه الأنسجة الدهنية والقنوات والجلد، وده بيحدده الطبيب بحسب تطور الحالة وانتشار الخلايا السرطانية.
- إزالة بعض العقد اليمفاوية، العقد الليمفاوية في الطبيعي بتستقبل تصريف من أنسجة الثدي.
في بعض حالات السرطان، الخلايا السرطانية بتوصل للعقد الليمفاوية دي خلال انتشارها، وده بيدفع الطبيب إنه يزيل العقد دي عشان يمنع انتشار الخلايا السرطانية لأماكن تانية في الجسم.
- استئصال الثديين، وده بيكون في الأغلب إجراء وقائي للسيدات اللي عندهم تاريخ عائلي قوي لسرطان الثدي.
العلاج الإشعاعي
ودي طريقة علاج بتعتمد على قتل الخلايا السرطانية عن طريق توجيه طاقة عالية للورم. والطريقة دي في الغالب بتكون بعد جراحات استئصال الورم، وممكن تاخد من ٣ أيام وتوصل ل٦ أسابيع.
الطاقة المستخدمة إما بتكون داخلية أو خارجية.
المعالجة الداخلية بتكون عن طريق إدخال مواد مشعة للجسم، لكن المعالجة الخارجية بتكون عن طريق آلة خارجية بتوجه حزم من الطاقة للجسم.
اقرأ أيضًا: هل أقدر ارضع طفلي طبيعي بعد تعرضي للعلاج بالكيماوي أو الإشعاعي؟
علاج سرطان الثدي الكيميائي
هي طريقة علاج بتعتمد على أدوية بتدمر الخلايا السرطانية اللي بتنمو بسرعة. العلاج الكيميائي ممكن يستخدم قبل الجراحة عشان يقلل حجم الورم ويسهل إزالته، وممكن كمان يستخدم بعد الجراحة عشان يقلل احتمالية رجوع السرطان تاني.
العلاج الهرموني
على عكس ما بيوحي اسمه، العلاج الهرموني مش بيكون عن طريقة إعطاء الهرمونات. العلاج الهرموني بيعتمد على وقف عمل هرمونات معينة، إما بمنع الاتصال بين الهرمون ومستقبلاته على الخلايا السرطانية أو عن طريق منع إنتاج الهرمون في الجسم من البداية.
العلاج الاستهدافي
العلاج الاستهدافي مجال بينمو بشكل سريع وبتهتم بيه أبحاث كتير في وقتنا الحالي.
طريقة العلاج دي بتعتمد على استهداف الخلايا اللي بتفرز مواد بتزود من نمو الورم. عشان كده ممكن استخدام العلاج الاستهدافي إما بعد الجراحة عشان يمنع رجوع السرطان أو في الحالات المتقدمة عشان يبطأ نمو الورم.
على أي أساس بتتحدد طريقة العلاج المناسبة؟
خيارات العلاج المتاحة لسرطان الثدي كتيرة وممكن تسبب ارتباك خلال اختيار الخطة العلاجية المناسبة.
خطة العلاج بتعتمد على حجم الورم والمرحلة اللي وصلها. كمان بيعتمد على حساسية الخلايا السرطانية للهرمونات والصحة العامة للشخص.
هل يمكن علاج سرطان الثدي بدون جراحة؟
سؤال بيطرق ذهن كتير مننا، الحقيقة إن فيه اتجاهات لدراسات حديثة كتيرة بتهدف لتقليل اللجوء لجراحة استئصال الثدي والاكتفاء بطرق العلاج التانية.
لكن، هل ده معناه إن ممكن نستغنى عن الجراحة تمامًا لعلاج سرطان الثدي؟ محدش يقدر يجزم بده في الوقت الحالي غير بعد اكتمال الدراسات دي.
أخيرًا
الخيارات المتاحة لعلاج سرطان الثدي كتير. لكن، لازم دايما تفتكري إن قبل تحديد خطة العلاج المناسبة، لازم يبقى عندك يقين إنك قد التحدي وهتجتازي رحلة العلاج؛ لأن ببساطة… أنتِ بطلة!
المصادر