أنتِ مش مجنونة.. تسمعي عن الجاز لايتنج؟

كتبت/ ميرهان فؤاد

أنا شفتك بعيني وأنت بتبعت لها رسالة فيها كلام حميمي!

يابنتي بيتهيألك، والله ماحصل، بطلي الخرافات اللي في دماغك دي! أنتِ مجنونة، إنتِ بتبالغي، أنا مش عارف أنتِ بتتكلمي عن ايه، أنتِ متأكدة؟ ما يمكن أنتِ ناسية. أنا مش فاكر اللي بتقوليه دا خالص، محصلش.

كام مرة حصل الموقف ده معاكِ؟ إن شريكك يتلاعب بيكي نفسيًا ويشكك في عينيك، وعقلك، لحد ما تبتدي تسألي فعلا هو أنا ظلمته؟ ويمكن كمان أنت إللي تتأسفي في النهاية، لو شفتي فيلم “أين عقلي” بطولة سعاد حسني ومحمود ياسين، تصرفات محمود ياسين مع سعاد لما كان بيحاول يشككها في قواها العقلية، دا اسمه تلاعب نفسي أو جازلايتنج! 

التلاعب النفسي نوع من أنواع العنف المعنوي، واللي بيميز العلاقات المسيئة، وهو مبيحصلش صدفة، لأ بيحصل بشكل ممنهج، ومتعمد، عشان يخلي الضحية أقل ثقة في نفسها ويفضل هو الطرف القوي في العلاقة ويعرف يسيطر عليها، والتلاعب بيحصل لدرجة إنك تشكي في ذاكرتك، وفي عقلك،  ومبتبقيش عارفة فين الحقيقة.

إزاي بيحصل التلاعب النفسي؟

أولاً التلاعب النفسي بيحصل عشان يتم السيطرة عليكي جسديا وعاطفيا، ودا بيبقى ليه طريقة وتكنيك، من خلال إن الشخص يغرقك بالأكاذيب، والمعلومات المغلوطة، وحتى الحاجات البسيطة، بتلاقيه بيكدب فيها، وفي النص ممكن تلاقيه يمدحك بشكل ما، عشان يربكك، تحسي أنه لا دا بيعاملني كويس، مش ممكن يكون بيكدب! وممكن يبدأ يقول لأهلك وأصحابك إن أنتِ بتكذبي، زي ما تقولي كدا بيقلب عليكي الترابيزة.

طب إزاي تعرفي أنه بيتم التلاعب بيكي نفسياً؟

الشخص اللي بيكدب وبيتلاعب بيكي نفسياً في العادة بيبقى واثق جداً من نفسه، ومش بيتهز، لكن بيسيبك أنتِ تشكي في نفسك، وفي تصرفاتك، وفي مخك. لو لقيتي نفسك طول الوقت بتشكي في نفسك، وحكمك على الأمور، وفي ذاكرتك، اعرفي إن في حاجة غلط، أكيد مفيش حد على طول هيبقى غلط، لما ثقتك بنفسك تنخفض جداً بسبب شريكك تأكدي إن العيب مش فيكي. كمان لما يستهان بمشاعرك ويقولك انتِ مزوداها أوي، ماخلاص بقى. ولما تحسي إنك دايما مدينة بالاعتذار للشخص ده. وإنك مش كفاية ليه، ومش على قد توقعاته. لما تحسي إن في تهديد ما من الشخص دا. ولما تحسي إنك مبقيتيش عارفة تاخدي قرارات. ولما تحسي إنك بقيتي خايفة تتكلمي، أو تعبري عن مشاعرك فتفضلي ساكتة. 

اقرأ أيضًا: علاقات مؤذية.. ليه الستات بتتعرض للعنف الجسدي؟!

إزاي تتصرفي لو شاكة إنه بيتم التلاعب بيكي نفسياً؟

التلاعب النفسي له تأثير ضار جداً بالصحة النفسية، وممكن يبقى مدمِر، ويسبب القلق، والاكتئاب، ويخلي الضحية تشك في كل الناس القريبة، وللأسف مفيش قانون بيحاسب على العنف النفسي. وأكيد لو بيتم التلاعب بيكي نفسياً يبقى أفضل حل هو الخروج من العلاقة المسيئة دي، لكن مش كل الناس عندها الاختيار دا، وعشان نقلل الخساير أنتِ محتاجة على الأقل متسيبيش حد يشككك في نفسك، اكتبي يومياتك، والأحداث المهمة، خدي صور. اتكلمي مع حد واثقة فيه. 

أنتِ مش مجنونة!

خليكي فاكرة كويس، أنتِ مش مجنونة، أنتِ بيتم التلاعب بيكي، صدقي حدسك، دي الحاجة اللي عمرها ما بتكدب، هل الشخص اللي بيقوم بالتلاعب دا مريض وممكن نساعده؟ الحقيقة آه ممكن، لكن أنا مش مركز تأهيل عشان أساعده، ممكن يتعالج بس بعيد عني، أنا أهم شيء بالنسبة لي هو سلامتي النفسية، أكيد أنا مش مسئولة أتعافى من الإيذاء اللي حصلي، وكمان مسئولة أصلح من الجاني. 

إزاي ممكن تتعافي من التلاعب النفسي؟

قولي لنفسك امتى وإزاي اتعرضتي للتلاعب النفسي، وخليكي دايما حذرة لعلامات التلاعب النفسي، اتكلمي مع أهلك وأصحابك، وأخيرًا بلاش تعيشي باحساس الضحية أنتِ دلوقتي ناجية.