كتبت ميرهان فؤاد
ظهرت إحصائية من فترة قصيرة عن وزارة التضامن بتقول إن 42% من الستات في مصر اتعرضوا للعنف الجسدي على إيد أزواجهم، يعني تقريبًا نص ستات مصر! خبر صادم جدًا وبيقول إن وضع الستات سيء جدًا.
دا لأن العنف الجسدي مش ممكن يبقى مقبول تحت أي ظرف من الظروف ومينفعش نغمض عينينا عن اللي بيحصل. وللأسف العنف ضد المرأة منتشر بشكل كبير جدًا عالميًا، ومنظمة الصحة العالمية بتقول إن واحدة من كل 3 ستات في العالم بتتعرض للعنف.
ايه هو تعريف العنف ضد الستات؟
الأمم المتحدة بتعرف العنف ضد الست بإنه مبني على أساس الجنس، وبينتج عنه إنه الست تتعرض لمعاناة، سواء سواء من الناحية الجسدية، أو النفسية، أو الجنسية، كمان العنف بيشمل التهديد، أو الحرمان من الحرية، كل دي أساليب عنف بتتعرض ليه الست.
أشكال العنف ضد الستات
وغير الجسدي في نوع تاني مش بيسيب أثر على جسم الضحية، لكن بيسيب أثر كبير على نفسيتها وهو العنف المعنوي، ودا ليه أشكال كتير، يتعصب عليكي، يتفه ويقلل منك دايمًا، يقولك انتي مبتفهميش، انتي ملكيش لازمة، انتي مش هتعرفي، يكسر مقاديفك بمعنى أصح. بينتج عن كل دا ستات مقهورة، ومحطمة نفسيًا، وعرضة لكل أشكال الاكتئاب. زائد كمان العنف الجنسي زي الاغتصاب الزوجي.
ايه اللي بيوصل الوضع لكده؟
طبعًا مفيش أي تبرير للعنف، لكن فيه عوامل بتخلي العنف يبقى موجود، الموضوع بيبدأ من التمييز بين البنت والولد في البيت، هي مضطرة تخدم أخوها، حتى لو كان هو الصغير، ومحرومة من امتيازاته، وممكن يضربها وأهلها يقولوا عادي، ماهو الراجل، الشخص اللي بيضرب أخته دا في المستقبل كمان هيضرب مراته، في كمان أفكار غلط عن حقوق الزوج على مراته، فلو قصرت في أي حاجة هو بيتعدى عليها جسديًا، كمان مستويات التعليم المنخفضة، وإدمان الكحول، والمخدرات، وانخفاض الدخل، فالرجالة اللي عندها مشكلة، أو غضب مبتلاقيش حاجة تفرغ فيها غضبها غير الست.
دور الأهل في العنف ضد الستات
كمان الأهل والمجتمع بيخلوا الست ترضى، وترجع لشخص ضربها، وسبب لها ألم نفسي، وجسدي، باعتبار إنه هتبقي ست مطلقة، مين هيصرف عليكي، الناس هتبصلك إزاي. وفي مبدأ شهير بيقول إن من أمن العقوبة أساء الأدب، الراجل بيبقى متأكد إن الست دي مش هتروح تبلغ عنه مثلًا، لو واثق أنه هيتسجن أكيد مش هيمد إيده عليها.
اقرأ أيضًا: الشعور بالألم أثناء العلاقة الزوجية | ألم يقتل المتعة
ليه الست بترضى بالعنف؟
لكن السؤال هنا ليه الست بترضى وتقبل بالعنف؟ الحقيقة في عوامل كتير، في ستات كانت مقهورة في بيوت أهاليها، وبتنضرب، وتتعنف، ويحصل تمييز بينها وبين أخوها، فبتطلع فاكرة إن دا الطبيعي، ايه يعني لما يضربني؟ وكتير الراجل بيعمل أساليب تخليها متقدرش تخرج من البيئة العنيفة دي، زي إنه يعزلها عن الناس، فميبقاش عندها حد تروحله، وزي إنها تكون معندهاش مصدر دخل، مبتشتغلش، هتروح فين لو سابته، في ستات كمان من كتر الإساءة بتبقى ثقتها في نفسها ضعيفة، بتقول أنا مستاهلش معاملة غير كدا، ودي برضه المجتمع ربى فيها الإحساس دا على مدى حياتها. ساعات كمان بتبقى مش لاقية حد يدعمها، بالعكس أهلها واقفين في صف جوزها وبيقولولوها متخربيش بيتك. لكن هل البيت الكويس هو اللي بتتربى الأطفال فيه شايفين أمهم بتنضرب؟ ويعيشوا خايفين واحتمال كمان هما يتعرضوا للضرب من الأب أو منها تفريغ للغضب اللي بتشوفه؟
ازاي نخرج من البيئة العنيفة؟
أول مرة هتتعنفي فيها غالبًا جوزك هيعتذر، بعد كدا للأسف ممكن العنف يزيد، واحنا بنشوف حوادث قتل حوالينا كل يوم، وفي مستويات متعلمة، ومثقفة. أنا مش بدعو الستات تترك أزواجها المعنفين، لأن دا مش قراري دا قرارك انتِ، كل اللي نفسي تعرفيه إن الراجل اللي بيضربك هو كدا تعدى خط في العلاقة مينفعش يرجعه تاني، وإن العنف الجسدي مش شيء عادي أبدًا، وانتي متستاهليش تبقي عايشة في بيئة زي دي، تتعبلك أعصابك، وتسببلك أمراض جسدية، ونفسية.
![](https://i0.wp.com/motherscz.com/wp-content/uploads/2021/10/Casi-200.000-mujeres-sufren-violencia-de-genero-cada-ano-en-la-Comunidad-de-Madrid.jpg?resize=532%2C358&ssl=1)
تعليق واحد
تعقيبات: الجاز لايتنج.. أنت مش مجنونة!