الفرق بين التوحد واضطراب فرط الحركة وتشتت الانتباه

لما بيواجه الطفل صعوبات سواء في الاندماج مع الناس أو التعليم، بتبدأ الأم تحتار يا ترى ابني ممكن يكون مصاب بالتوحد أو فرط الحركة؟ طيب إيه الفرق بين التوحد واضطراب فرط الحركة وتشتت الانتباه (ADHD)؟

كان في خلط كبير بين التوحد وفرط الحركة قبل ما العلماء يوصلوا لتفاصيل كتيرة عن المرضين دول.

اضطراب نقص الانتباه مع فرط الحركة ADHD 

اضطراب نقص الانتباه مع فرط الحركة هو مرض مزمن بيصيب الأطفال وهو شائع وفقًا لإحصائيات تقريبا 9.4% من أطفال الولايات المتحدة من سن (2_17) سنة، بتعاني اضطراب نقص الانتباه مع فرط الحركة.

أنواع الاضطراب

ليه ثلاثة أنواع وهما :

تشتت الانتباه

الطفل بيكون مشتت ومش قادر يركز إنه يخلص اللي مطلوب منه، بيكون مش قادر يتبع أي تعليمات ولا يهتم بأي تفاصيل.

فرط الحركة الاندفاعية

الطفل لو مصاب بالنوع ده من اضطراب الحركة ونقص الانتباه بيكون ليه صفات معينة زي:

•  بيكون ليه لزمات معينة زي أنه يهز رجليه، أو يشد شفته، أو يغمض عينه حركات متتالية كتير.

• الطفل في الحالة دي بيتكلم كتير مش بيقدر يقعد في نفس المكان فترة طويلة.

النوع المشترك 

الطفل بيجمع بين كل الصفات اللي ذكرناها فوق.

اضطراب طيف التوحد ASD

التوحد برضه مرض مزمن بيأثر على سلوكيات ونمو الطفل، وكمان بيأثر على حياته الاجتماعية وتفاعله مع الآخرين.

تقريبًا واحد من كل 68 طفل في الولايات المتحدة مصاب بالتوحد، ولقوا إن نسبة الإصابة بين الأولاد 4.5 مرة أكتر من البنات وده وفقًا لموقع Healthline.

إيه الفرق بين التوحد وفرط الحركة؟

الأطفال في الحالتين بيكون عندهم مشاكل في التواصل والتركيز وبيكون في علامات التشابه بين اضطراب طيف التوحد وفرط الحركة.

الجدول ده هيعرفنا الفرق بين التوحد وفرط الحركة وتشتت الانتباه في بعض الصفات.

وجه المقارنة	التوحد	اضطراب نقص الانتباه وفرط الحركة
بيفقد تركيزه بسهولة	لا	نعم
حركته سريعة ومش بيقدر يركز في حاجة واحدة وينجزها	لا	نعم
مش بيستجيب لأي مؤثر خارجي (حد ينده عليه_أي صوت جنبه)	نعم	لا
صعوبة التركيز في مهمة واحدة	لا	نعم
تركيز مكثف على حاجة واحدة	نعم	لا
بيتكلم كتير وأفكاره مشوشة	لا	نعم
فرط في الحركة	لا	نعم
مش بيقدر يقعد كتير	لا	نعم
مقاطعة الآخرين في كلامهم ونشاطاتهم	لا	نعم
فاقد التواصل البصري مع الي قدامه	نعم	لا
مشكلة في الاندماج مع الآخرين	نعم	لا
عدم الاهتمام أو عدم القدرة على فهم مشاعر الآخرين	نعم	نعم
تأخر في نمو العقلي للطفل	نعم	لا
انعزال عن الآخرين وعدم مشاركتهم أنشطتهم	نعم	لا
ليه حركات متكررة	نعم (يدور حول نفسه_تكرار حركة اليدين)	نعم (يهز جليه)

اقرأ أيضًا: أشهر الخرافات عن مرض التوحد ..متصدقيش كل الكلام!

هل ممكن الطفل يصاب بالتوحد وفرط الحركة مع بعض؟

وفقًا لمنظمة التحكم في الأمراض والوقاية منها (CDC) 

تقريبا 14% من الأطفال المصابين بفرط الحركة بيكونوا مصابين بالتوحد كمان.

تظهر علامات التوحد وفرط الحركة على الطفل، بيتكون عنده  مشكلات كبيرة في الاندماج مع الآخرين وصعوبات التعلم وحلها بيكون أصعب.

ما حقيقة الدمج بين التوحد وفرط الحركة عند الأطفال؟

لسنوات طويلة كان الدكاترة في تردد شديد أنهم يشخصوا طفل مصاب بالتوحد وفرط الحركة في نفس الوقت.

اعتقدت الرابطة الأميركية للطب النفسي لسنوات إن مافيش أي حالات فيها دمج بين التوحد وفرط الحركة، لكن المفاجأة إن في عام 2013 أُصدر الإصدار الخامس للدليل التشخيصي والإحصائي للاضطرابات النفسية (DMS-5)  وأعلنت فيه عن إمكانية إصابة الطفل بالمرضين سوا.

كل يوم العلم بيتوصل لمعلومات جديدة في أمراض كتيرة ومنها الفرق بين التوحد واضطراب فرط الحركة وتشتت الانتباه من الحاجات اللي الدراسات فيها مش كفاية وفي حقايق كتير لسه مجهولة.

خلاصة الكلام، الفرق بين التوحد واضطراب فرط الحركة وتشتت الانتباه بيحتاج مساعدة طبيب مختص.

اتكلمي مع الطبيب وأحكي له كل الأعراض اللي بتلاحظيها على طفلك، كل يوم الطب في جديد ونتمنى يوصلوا لعلاج يخليكي تشوفي طفلك في أحسن حال.

المصادر

https://www.healthline.com/health/adhd/autism-and-adhd#adhd-vs-autism

https://www.ncbi.nlm.nih.gov/pmc/articles/PMC5575584/

https://www.cdc.gov/ncbddd/adhd/data.html