سلسلة صرخة مراهق الحلقة الثانية (حكايات بنات من فصل C /5)

كتبت/ شيري رمسيس

في سلسلة حلقات صرخة مراهق هنعرف إيه بيدور في دماغ أولادنا وبناتنا في سن المراهقة، وإزاي بيشوفوا ردود أفعالنا على تصرفاتهم ومردود كلامنا عليهم بيكون إيه، وده في محاولة مننا إننا ندخل جوه دماغهم عشان نفهم اكتر ونحاول نقدملهم الدعم والنصيحة بشكل صحيح.

حكاية جنا

جنا قالت مش عارفة إيه اللى اتغير السنة دى عن أى سنة تانية ، بنات الفصل شكلهم اتغير بس أنا حاسة أني مش زى باقي البنات ، حساهم كبروا وأنا لأ أنا لسه بلبس اليونيفورم بتاع السنة اللى فاتت لسه جاى على قدى، ولسه ماما بتعملي شعري ضفاير زي زمان ، بنات كتير شكلهم أتغير أوي ده حتى فيه بنات بقيوا شبه ماما كدة شوية، فيه بنت معانا في الفصل بقت أطول من مامتي !! بنات عاملين شعرهم كيرلي وبيلموه بس لما الميس بتيجى، شعرهم شكله حلو أوي، قلت لماما عايزة أعمل شعري كيرلي قلتلي بس بلاش كلام فاضي وأصرت على الضفاير.

فيه بنات كمان في الفصل لابسين برا زى ماما، وأنا لسة بلبس فنلات ملونة فيها فيونكات ..

مرة شفت بنت فى الفصل معاها فوطة صحية، أنا بشوف ماركة الفوط الصحية للبريود دي في الإعلانات وشفتها فى دولاب ماما، لما سألت ماما إيه دي ؟! قالتلي لما تكبري هتعرفي، بس أنا شكلى كده مش هكبر أبداً أنا قصيرة ورفيعة وشكلي كأني لسه في تانية أو تلاتة إبتدائى بالكتير، نفسى أكبر وأبقى زيهم ولا أنا هفضل عيلة كدة على طول؟!! أنا خايفة ما أكبرش هو انا ممكن ما أكبرش عن كده فعلاً؟؟

حكاية حبيبة

حكت حبيبة وقالت أنا اتغيرت شكلي اتغير أنا مش شبه صوري بتاعة السنة اللي فاتت، أوقات ببقى مبسوطة أنى كبرت وبقيت شبه الستات، وأوقات تانية بكون متضايقة ومخنوقة وحاسة إن فيا حاجة غريبة، ساعات كتير بعيط.. بعيط مش عارفة ليه، أقل حاجة بقيت تزعلني، ماما بتقولي أنتِ بقيتى بلمسه وبقيتى نكدية.

الأسبوع اللى فات خرجنا مع عمي وأولاده روحنا النادي، وأنا كنت مبسوطة أننا هنتفسح، قبل ما ننزل جيت أطلع لبسي من الدولاب كل ما البس حاجة الاقيها بقيت ضيقة أو قصيرة، لبست طقم بنطلونه بقى ضيق شويتين وكنت حاسه أنه هيفطسني، ماما قالتلى أنتِ تخنتي أوي كل هدومك باظت، خدي بالك من أكلك، قالتلي كدة قدام بابا وأخويا وأنا اتكسفت أوي واتضايقت، بس مشيت من قدامها وقلت مش هاعيط. وجريت لميت حاجاتى ونزلنا.

فى النادي بدأت ألعب مع أولاد عمي وكنا بنجري ونلعب مبسوطين، ماما ندهتلي وقالتلي اقعدي شوية كفاية كدة أنتِ مش صغيرة.

قعدت شوية وبعدين جم ولاد عمي ندهوا عليا علشان نكمل لعب وأنا بقيت مش عارفة أقوم ألعب معاهم ولا أفضل قاعدة ساكتة ولا أعمل إيه؟!!

ماما ميلت عليا وقالتلي بصوت واطي “بطلي جري جسمك بيتهز وكدة غلط” .. طب أنا مفروض اعمل إيه فى جسمي ده؟ اكل ولا ماكلش علشان ما اتخنش؟ لما مش باكل ماما بتزعقلى وكل شوية تقولي خدي بالك من أكلك مش فاهمة يعنى أنا اعمل إيه؟ أنا بحب الشيكولاتة وبشتريها من مصروفي، بقيت باكل الشيكولاتة فى الباص وأنا مروحة من المدرسة وبرمي ورقتها فى الشارع علشان ماما ماتشوفنيش وأنا باكلها ولا تعرف حتى إني أكلت الشيكولاتة.

اقرأ أيضًا: سلسلة صرخة مراهق.. الحلقة الأولى (أنا مش عارفني)

حكاية مايا

قالت مايا أنا كبرت شوية شكلي اتغير شوية عن السنة اللي فاتت ، لبسي فيه كتير منه مبقاش على مقاسي، التيشيرت البينك والشورت الجينز الموف دول كنت بحبهم أوي، الشورت مش راضي يقفل عمالة اشفط فى بطني بس مش عارفة ارفع السوستة خالص، التيشيرت شكله بقى ضيق شوية بس اهو بيتلبس.

ماما أول لما شافتني وأنا لبساهم قعدت تضحك وقالتلي كبرتي يابنوتة، وأخدتني فى حضنها، حضن ماما وضحكتها خلونى ضحكت بالرغم من أني كنت متضايقة أوى علشان هدومي اللى صغرت عليا.

• ماما قالت: متزعليش هنجيب حاجات أحلى منها.
• قلتلها بس أنا مش عايزة أدى هدومي دي لحد

قلتلى براحتك خليهم عندك، وبعد اسبوع ماما جبتلي شورت جينز جديد أكبر شوية، شكله حلو وعجبنى بس أنا لسه بحب الشورت القديم الموف.

ماما قالتلى أنها مبسوطة أني كبرت وقريب هبقى مدموازيل، أنا مفهمتش أللى هو إزاى يعنى؟ واتفقت معايا اننا هنتكلم فى الموضوع ده سوا لما نخرج فى الويك إند لما نروح النادي.

يوم الخميس استحميت وجهزت هدومي وماما عملتلي شعرى ضفاير علشان افكها الصبح واسيبه ويطلع شكله مموج.

يوم الجمعة فطرنا فى البيت أنا وأخويا وبابا وماما ، بابا كان عنده شوية شغل وقال هيعدي علينا فى النادي لما يخلص، وأول لما وصلنا أخويا راح التمرين بتاعه وقعدت أنا وماما هى جابت ليا الميلك شيك اللى أنا بحبه، وقالتلى عايزة اكلمك فى موضوع مهم قلتلها اتفضلي لقيتها طلعت من شنطتها كتاب شكله حلو عليه بنوتة تيجى قدي كدة الكتاب كان بيتكلم عن البنات وعن البريود وإزاي بتكبر وتبقى انسات .

ماما قرت معايا الكتاب، وحكتلى عن البريود اللي ضروري بتيجي لكل الستات، أنا كنت شفت إعلانات فوط صحية فى الـ T.V وشفتها كمان فى دولاب ماما بس مكنتش عارفة هى بتعمل بيها ايه!!

ماما شرحتلي وفهمتنى وقالتلى إن جايز البريود تجيلي قريب أوى، وإن دي هتكون حاجة حلوة.

كلام ماما طمنى، والكتاب اللى جبتهولي ده كمان بسطنى أوي بعد كدة قمت ألعب مع بنوتة صاحبتى كانت موجودة فى النادى .

أنا مبسوطة أنى بنت وقريب هبقى مدموزيل.