استقبال رمضان: إزاي نفرح بالشهر الكريم مع أولادنا؟

كتبت: مروة مصطفى

“رمضان جانا وفرحنا به بعد غيابه”، من ساعات هل علينا شهر الخير والبركة، شهر الفرض والعبادة والتقرب إلى الله، شهر الفرحة، شهر الجود وصلة الرحم، والأعمال الصالحة. شهر رمضان هو الشهر التاسع في شهور السنة الهجرية، في مقالنا هنتعرف على أفضل طرق استقبال رمضان، عشان نفرح بيه مع ولادنا.

أزاي نجهز نفسنا لاستقبال رمضان؟

لازم إحنا الكبار نرجع نحس برمضان وجماله ومنكررش جملة زي ( أنا مش حاسة برمضان ) ليه مش هنحس بيه، ده شهر الخير والبركة، طيب إزاى نستعد لرمضان؟

الزينة اللي في كل مكان وأغاني رمضان كفيلة تدخلك في فرحة رمضان، طيب مش هتقدري تشتري زينة، ممكن تعمليها في البيت بالفوم وترسمي عليها فانوس، وبعدها تقصيه وبس كده بقى عندك أحلى فانوس بألوان اللى تحبيها تفرحي وتفرحي ولادك.

كمان نقدر نستخدم قماش الخيامية عشان نعمل بيه زينة ونعلقها في البيت، بمنتهى البساطة هتجيبي القماش وتقصيه على شكل مثلث مقلوب، ونبدأ نلزقها على خيط ملون، والأجمل إننا كمان نستخدم فرع نور معاها، بكده  بقى عندنا أحلى زينة رمضان وبمبلغ بسيط جدًا.

وجود الأنوار والزينة في البيت كفيل يشعرك بالفرح أنتِ وأسرتِك، حاجات مختلفة عن الأيام العادية، وبهجة وفرحة ننشرها في كل مكان حوالينا.

ننوي الصيام والقيام والدعاء والصدقة، وكل الأعمال الحسنة، ونرجّع بهجة استقبال الشهر الفضيل، فرصة عظيمة للتقرب إلى الله، وأداء فروضنا بطريقة صحيحة.

نقول إيه لأولادنا عن استقبال رمضان؟

حسب سنهم نبدأ نحفظهم كلمة (رمضان)

من سن سنة، نفرجهم على بوجي وطمطم، وبكار، والمغامرون الخمسة، و ظاظا وجرجير، وفوازير نيللي، ومن سن سنتين أو أكتر يقدروا يتفرجوا معانا على قصص الانبياء ونشرح ليهم كل قصه بطريقة مبسطة. أكيد أفتكرتوا كنا بنشوف ايه في رمضان، وكنا بنحب نتفرج على ايه، هو ده اللى عايزين نوصله، أننا نعيشهم ونعيش معاهم جو رمضان، ونرجع طفولتنا وياهم.

من سن ٣ سنين فيما فوق، نقدر نشرح ليهم بطريقة بسيطة عن رمضان، ونقولهم إن القرآن نزل فيه عشان يقوم سلوكنا ويهدينا للطريق الصحيح، هو من أعظم شهور السنة، نقوي علاقتنا بربنا، و نمنع نفسنا عن كل ما هو سيء، وتتأدب مع الله في أفعالك وكلامك، زي ما بنطلب منهم أنهم يتأدبوا معانا، ولله المثل الأعظم. 

نبدأ نسألهم عارفين يعنى إيه صيام رمضان؟

نعرفهم إن رمضان فرصة لضبط النفس وتعديل السلوك والبعد عن الغلط، زي إننا نضرب أخواتنا أو أصحابنا، او نقول كلام نضايق بيه الآخرين، رمضان بيدربنا على السلوك القويم، اللي نحب نكون بيه طوال السنة، ونعمل الأعمال الحسنة عشان ربنا يرضى عننا.

نقولهم إن الصيام هو أن نمتنع عن الأكل والشرب من الفجر حتى غروب الشمس، وإن قبل الفجر بيكون في وجبه اسمها السحور، وبعد الغروب في وجبة تانية واسمها الإفطار. الصوم هو وسيلة لمواجهة الجوع بتخلينا نشعر بالناس الأقل حظًا، ونتعلم نشكر ربنا على كل النعم اللي عندنا.

إيه اللي ممكن نعمله في رمضان ويضيف ليهم؟

أول حاجه إحنا لازم نحببهم في رمضان، خلاص اتفرجنا على شخصيات كرتونية، وسمّعنا الطفل أغاني رمضان طب ايه اللي الأطفال مسكينه في أيديهم ده ؟!

ده فانوس بينور ويغني كمان وهنجيب منه، وننزل سوا نختار فانوس أو لعبه فيها أغاني رمضان، اللى انتى سمعتها له أصلًا، فيربط اللعبة برمضان، ويبقى عارف إن دي اللعبة بتاعة رمضان، ممكن كمان نجيب لبس جديد نلبسه اول يوم رمضان.

 رمضان بيعلمنا ويعلمهم الصبر، واللي وأولاده سنهم ميسمحش بالصوم بيعلمهم كلمه أنا وبابا صايمين، يعني هيكبر على كلمة صيام ومربتط برمضان وأجوائه.

 كمان يعتبر فرصة عشان نعلم أولادنا معنى وقيمة الصدقة وآدابها، ونخليهم هما اللى يعطوا السائل، ويحضروا معانا شنط رمضان، ولو هنعمل إفطار صائم يحضروا ولو حاجة بسيطة، وده هيزرع جواهم الحنية والعطف والإحساس بالغير.

ده غير إنه وقت مناسب جدًا عشان نعلمهم الصلاة، نجيب لهم سجاده ألوانها حلوة وعليها رسمة ملفتة ويقفوا جنبنا ويقلدونا. ده غير كمان صلة الرحم، والزيارات والعزومات، ولو أنتِ أم مغتربة ممكن نعمل “فيديو كول” والعيلة متجمعة وتسلموا عليهم وتهنوا بعض.

أزاي تهيئ ولادك لأول يوم صوم؟ 

لو أطفالك في سن الصيام، يبقى نستعد من قبل رمضان بأسبوعين، ونعودهم على قيلولة في نص اليوم، بحيث يقلل وقت الصيام ليهم.

ممكن كمان نجيب لعب وأنشطة تلهيهم عن الجوع والعطش، ونشجعهم بلوحة عليها عدد ساعات الصيام والصلوات، ونحط لهم نجمة على مربع كل صلاة، وعلى اليوم اللي يصومه، ويكون في جائزة في نهاية رمضان تقديرًا لالتزامهم بالصلاة والصيام.

الأم هي فرحة كل بيت ونوره، أنتِ اللي هتحببي أولادك في رمضان، وتقدري تستغليه كفرصة عشان تزرعي فيهم الإيمان والقيم الحميدة. افرحي مع أولادِك وفرحيهم. كل سنه وكل ابنه وأخت وزوجة وأم بخير. كل سنه وأنتي نور بيتك.