هل ممكن يهاجمني سرطان الثدي وأنا حامل؟

الحمل وسرطان الثدي سيناريو مخيف للبعض.. والإجابة على سؤال هل ممكن يجيلي سرطان الثدي وأنا حامل بتكون أيوة.

يعتبر سرطان الثدي من أكتر أنواع السرطان اللي بتصيب الحوامل بجانب سرطان الغدة الدرقية ومرض هودجكن -اللي بيكون نوع من سرطان الدم بسبب زيادة خلايا الدم البيضاء- وسرطان الغدد الليمفاوية.

احتمالات الإصابة بسرطان الثدي للحوامل

في إحصائية نشرتها المؤسسة الأمريكية الوطنية لأبحاث السرطان (National Foundation of Cancer Research in United States of America) عن احتمالات الإصابة بسرطان الثدي أثناء الحمل، قالت إن من كل ١٠٠٠ حامل في واحدة بيجيلها سرطان الثدي.

 بينما قالت المؤسسة الأمريكية الوطنية لأبحاث السرطان إن من بين كل ٣٠٠٠ حامل في واحدة بيجيلها سرطان الثدي. 

لحسن الحظ دي تعتبر نسبة قليلة للإصابة لكن مبتنفيش إن في حوامل بيصابوا بالمرض.

أعراض سرطان الثدي عند الحوامل

أعراض المرض بتكون غير واضحة نتيجة التغيرات اللي بتحصل للحامل واللي بتتشابه مع أعراض المرض.

• كبر حجم الثدي ووجود كتلة ورم في الثدي.
• نزول سائل من الحلمة.
• تغيرات في شكل الثدي.
• انتفاخ في البطن.
• صداع وإحساس دائم بالإرهاق.
• غثيان وقئ.(قيء)
• نزيف أثناء التبرز.

التشخيص

حسب الإحصائية اللي نشرها مركز سلون كيترينج التذكاري للسرطان (Memorial Sloan Kettering Cancer Center) إن من كل ٥٦ ست حامل وعندها سرطان الثدي في ١٢ واحدة بيتم تشخيصهم.

ومعنى كدة إن غالبية السيدات الحوامل المصابة بالمرض بيتشخصوا في مرحلة متقدمة من المرض فبيكون انتشر السرطان في الثدي بشكل كبير.

تشخيص السرطان للحامل بيكون أصعب من السيدة اللي مش حامل، طب ليه؟ لإن بيحصل للحامل تغيرات في الثدي نتيجة للحمل زي إن حجم الثدي بيكبر الضعف من ٢٠٠ جرام ل ٤٠٠ جرام.

ولحسن الحظ، أغلب طرق التشخيص آمنة على الحامل والجنين لكن لازم تستخدم بحرص بمعنى إن مينفعش تتكرر كتير.

بيتم التشخيص بواسطة:

• التصوير المقطعي.
• فحص جزء من نسيج الورم.
• أشعة الماموجرام.
• الأشعة السينية.
• التصوير بالرنين المغناطيسي.
  
  اقرأ أيضًا: الرضاعة الطبيعية وسرطان الثدي.. ممكن؟ وامتى؟

أسباب الإصابة

لحد الآن مش معروف سبب للإصابة بسرطان الثدي غير العوامل الچينية والوراثية لكن فسر الباحثون  زيادة فرص الإصابة بسرطان الثدي عند الحوامل لزيادة نسبة الهرمونات نتيجة للحمل.

فرص انتشار المرض؟ 

للأسف فرص انتشار المرض بتكون كبيرة لإن التشخيص المبكر للحالة بيكون صعب نتيجة لإن أغلب المصابات مش بيبان عليهم أعراض.

امتى اقدر اتعالج؟ 

يقدر الطبيب يحدد العلاج المناسب حسب الحالة، لكن بيفضل تكون المريضة تجاوزت الثلث الأول من الحمل.

العلاج

يعتمد العلاج هنا على عوامل كتير زي مرحلة المرض ومرحلة الحمل نفسها كمان حجم الورم وانتشاره.

في الغالب بيكون العلاج بالجراحة أو بالعلاج الإشعاعي أو الأدوية، لكنه بيتوقف على مرحلة الحمل نفسها بمعنى إن لازم تكون المريضة تجاوزت الثلث الأول من الحمل.

أما بالنسبة للعلاج الإشعاعي -على الرغم من أمانه- إلا إن بيفضل الأطباء نستنى لحد الولادة لكن بيهتم الطبيب خلال الحمل بالفيتامينات والأدوية اللي بترفع المناعة.

وبعد الولادة بينصح الأطباء الأم إنها تستخدم اللبن الصناعي لطفلها لإن اللبن الطبيعي بينزل فيه الأدوية وبيكون خطر على الطفل.

خطورة سرطان الثدي والحمل على جنيني

سرطان الثدي في حد ذاته مفيهوش خطر على الجنين، لكن الخطر بيكون على الأم. 

يعتمد الخطر على مرحلة المرض لإن نسبة الخطورة على الأم بترجع لمرحلة اكتشاف المرض.

لكن المشكلة بتكون من العلاج نفسه لو كانت المريضة في أول ٣ شهور من الحمل لأن وقتها بتكون الأعضاء الداخلية للجنين مكتملتش وبيكون في احتمالية كبيرة لحدوث التشوهات.

لكن بعد أول تلت من الحمل تقدر المريضة تأخد العلاج الإشعاعي -على سبيل المثال- بأمان.

وتقريبًا أقصى خطورة ممكن يتعرضلها الجنين هي إن وزنه وقت الولادة يكون أقل من الطبيعي، وإن كان مش دايمًا بتحصل وتعتبر من الحالات النادرة إن الجنين يتأثر بالمرض.

علشان الإجابة على سؤال هل ممكن يجيلي سرطان الثدي وأنا حامل بتكون أيوة، حابين نقول لمريضة سرطان الثدي أنتي بطلة، متتردديش لحظة إنك تاخدي العلاج المناسب لحالتك وتهتمي بصحتك علشان نفسك وعلشان طفلك.. لكي منا كل الحب والدعم.

المصادر:

https://www.ncbi.nlm.nih.gov/pmc/articles/PMC6128597/

Research for a Cure