Mothers Comfort Zone Mothers Comfort Zone
لقاح كورونا من أكتر الأمور اللي شاغلة بال كتير مننا في الوقت الحالي، أسئلة كتير ومخاوف أكتر بتواجه كتير من الأمهات..
هل تطعيم كورونا وقت الرضاعة هيأثر عليا؟ هل هيتنقل لطفلي لو أخدته؟ إيه اللي لازم أخد بالي منه لو أخدت تطعيم كورونا؟
ينفع أتلقى تطعيم كورونا وقت الرضاعة؟
بحسب الكلية الأمريكية لأطباء النساء والتوليد (ACOG) في آخر تحديث، إن لقاح كورونا مناسب لكل الأفراد اللي سنهم أكبر من ١٢ سنة، بمن فيهم السيدات الحوامل واللي بيرضعوا أطفالهم. وده معناه إنك تقدري تتلقي التطعيم وقت الرضاعة بدون ما تقلقي على نفسك أو على طفلك.
وبحسب نفس المصدر، لقاح كورونا مش بيسبب عدوى للأم أو للطفل، بل بيوفرلهم وقاية من ڤيروس كورونا.
إيه اللقاح المناسب ليا؟
كثرة اللقاحات المتاحة خلت الاختيار ما بينهم صعب نسبيًا. من اللقاحات المتاحة حاليًا:
- لقاح فايزر (Pfizer-BioNtech) والمصرح به لكل من يتجاوز عمره ١٦ سنة وبيتطلب جرعتين.
- لقاح موديرنا (Moderna): لقاح بيستخدم تقنية مشابهة للقاح فايزر وبيتطلب جرعتين.
- لقاح چونسون (Johnson&Johnson): وده بيختلف عن باقي اللقاحات في إنه بيستخدم صورة معدلة غير مؤذية من الڤيروس وبيتطلب جرعة واحدة بس.
الدراسات الحالية بتثبت فعالية اللقاحات الثلاثة في تخفيف مخاطر العدوى الشديدة والوفاة من مضاعفات ڤيروس كورونا.
وبالرغم من إن بعض الناس اللي تلقوا جرعات اللقاح كاملة ممكن يصابوا بالڤيروس، إلا إنها بالتأكيد بتكون عدوى بأعراض أخف ومخاطر أقل.
انتقال عدوى كورونا من الأم للطفل
على الرغم من الاعتقاد الشائع حاليًا إن ڤيروس كورونا بيتنقل من الأم للطفل من خلال لبن الرضاعة. الحقيقة إن مفيش أي تقرير -حتى الآن- بيثبت ده، لكن المُثبت إن الڤيروس ممكن ينتقل من الأم للطفل عن طريق التلامس أو عن طريق الرذاذ.
وده معناه إنك تقدري ترضعي طفلك بشكل طبيعي إذا كنتِ مصابة بڤيروس كورونا، لكن ده بالتأكيد بعد أخذ الاحتياطات اللازمة من تطهير مستمر ولبس الكمامة أثناء الرضاعة أو الاقتراب من الطفل.
وعلى العكس، تطعيم كورونا وقت الرضاعة بيساعد الأم تكوّن أجسام مضادة. الأجسام المضادة دي بدورها بتُفرَز في لبن الأم وتوصل للطفل عشان تحفز جهازه المناعي.
اقرأ أيضًا: هل ممكن يهاجمني سرطان الثدي وأنا حامل؟
الأعراض الجانبية لتطعيم كورونا وقت الرضاعة
من أكثر الأمور المؤرقة واللي مخليه كتير من الناس مش مقدمين على تلقي لقاح كورونا، هي الخوف من الأعراض الجانبية.
معظم الأعراض الجانبية اللي اتسجلت بتستمر لأيام محدودة، وفي الأغلب بتدل على إن الجسم بيستجيب للقاح وبيبني مناعة وحماية ضد الڤيروس.
الأعراض الجانبية ممكن تحصل بعد تلقي أي لقاح من اللقاحات المتاحة، لكن بتختلف شدة الأعراض باختلاف العديد من العوامل؛ منها نوع اللقاح ومناعة الشخص المتلقي للقاح. الأعراض دي بتكون أشد خصوصًا بعد الجرعة التانية في اللقاحات اللي بتتطلب أكتر من جرعة.
أكثر الأعراض الجانبية المعروفة لتطعيم كورونا:
- ألم في مكان تلقي اللقاح.
- تورم وألم في بعض العقد الليمفاوية المحيطة بمكان تلقي اللقاح.
- الصداع.
- آلام في المفاصل والعضلات.
- الغثيان والقيء.
- بعض الحالات النادرة قد تعاني من الحساسية لأحد مكونات اللقاح.
أخيرًا
الدراسات الحالية في تطور مستمر عشان تكشفلنا كل جديد عن ڤيروس كورونا وتأثير اللقاحات الموجودة على المدى البعيد. كل اللي علينا إننا نتابع كل الدراسات والتحديثات ونستشير الطبيب الخاص عن أي مخاوف نواجهها.
المصادر