وصفات لبشرتك من تفل القهوة.. دكتور تجميل في مطبخك

كام مرة سمعتي عن فوائد القهو للبشرة خصوصًا الدهنية، طيب عارفة إن في منتجات كتير جدًا للعناية بالبشرة والجسم مستخلصة من القهوة؟

الحقيقة إنك تقدري تعتمدي على تفل القهوة كصديق جديد لكِ في رحلة جمالك وأهتمامك ببشرتك الدهنية، وده بيرجع طبعًا لإحتواء القهوة على مضادات أكسدة، وكمان حمض (الكلوروجينيك) المعروف بنتائجه العظيمة في معالجة حب الشباب الناتج عن تراكم الدهون والجلد الميت على البشرة، لأننا للأسف في أغلب الأوقات مش بنقوم بتنظيف بشرتنا بشكل صحيح.

بس من النهاردة مش هترمي تفل القهوة تاني.. أحنا هنقولك على وصفات سهلة تعمليها في مطبخك تحافظ على جمال بشرتك.

ماسك القهوة وعصير الليمون

المكونات:

2 ملعقة كبير من تفل القهوة

5 نقط من عصير الليمون الطازج

ملعقة صغير عسل أبيض

طريقة التحضير والاستخدام

امزجي كل المكونات في طبق إزاز وقومي بتقليبهم كويس جدًا، لحد ما يكون عندك مزيج متجانس.

ضعي الخليط على بشرتك بالكامل، بإستثناء منطقة حول العين طبعًا، وبعد 3 دقايق من وضعه على البشرة، دلكي بشرتك بأطراف أصابعك بشكل دائري-وطبعًا بننصح بإستخدام نفس الوصفة للرقبة والوجه مع بعض- واستمري في عملية التدليك لمدة 3 دقايق على الأقل.

وبعدها اغسلي وجهك بالغسول وبالمياة الدافئة، وطبعًا تجفيف البشرة بيكون عن طريق الضغط بالفوطة على البشرة بطريقة رقيقة وتجنبي تمامًا المسح بالطريقة المتعارف عليها لأنها طريقة غير صحية على الإطلاق.

ودلوقتي بشرتك هتتمتع بإشراقة ونظافة مش هيكون ناقص بس غير كريم مرطب وكده انتهت المهمة.

بينصحك خبراء التجميل بإستخدام ماسك تفل القهوة والليمون مرة أسبوعيًا للبشرة الدهنية.

اقرأ أيضًا: هل ينفع أكمل جلسات إزالة الشعر بالليزر وأنا حامل؟!

ماسك القهوة والزبادي

المكونات

ملعقة كبيرة من تفل القهوة

ملعقة كبيرة من اللبن الزبادي (خالي الدسم)

طريقة التحضير والاستخدام

امزجي المكونات مع بعض لحد ما تحصلي على مزيج متجانس، قومي بتوزيعها على بشرتك بالكامل بإستثناء منطقة حول العين، والمرة دي مش هنقوم بعمل أي تدليك للبشرة، بالعكس أحنا هنسيب المسك على بشرتنا لمدة ربع ساعة كاملة.

ودلوقتي اغسلي بشرتك بالغسول والمياة الدافئ ونشفي بالطريقة الصحيحة.

ينصحك خبراء التجميل باستخدام ماسك القهوة والزبادي مرتين أسبوعيًا.