كتبت/ دعاء حازم
هل جلسات إزالة الشعر بالليزر خطر على جنيني؟! طيب ايه البديل عنها؟
العناية والاهتمام بأجسامنا وقت الحمل من أكتر الأمور اللى بتشغلنا وتعتبر نوعًا ما صعبة علينا لكن بتفرق فى حالتنا النفسية وثقتنا فى نفسنا جدا
مؤخرًا من أكتر الوسائل الشائعة وسهلة لكتير مننا على الرغم من التكلفة اللى أصبحت متاحة ومناسبة، خلينا نعرف هل الليزر آمن خلال فترة الحمل و امتى نقدر نكمل جلسات الليزر بعد الولادة ؟
هل ينفع استمر في جلسات الليزر خلال فترة الحمل ؟
![](https://i0.wp.com/motherscz.com/wp-content/uploads/2021/11/جلسات-الليزر.jpg?resize=618%2C259&ssl=1)
في عدة أفكار وخرافات بخصوص الليزر من بداية استخدامنا ليه (الليزر بيجيب كانسر الليزر ممكن يسبب إجهاض … الخ) بس لحد دلوقتي لم تظهر ورقة بحثية واحدة أو حالة واقعية تثبت المخاوف دى.
ليه جلسات الليزر ممنوعة خلال الحمل
![جلسات الليزر وكلف الحمل](https://i0.wp.com/motherscz.com/wp-content/uploads/2021/11/جلسات-الليزر-وكلف-الحمل.jpg?resize=618%2C413&ssl=1)
خلال فترة حملنا بيحصل لأجسامنا وخاصة المناطق الحساسة ما يسمى بالكلف (hyperpigmentation) ممكن نكمل جلسات الليزر، ولكن على باور أقل لاننا هنكون عرضة لحروق الليزر. وكمان النتيجة المتوقعة من الجلسات هتكون غير مرضية بالنسبالنا.
مع الأخذ فى الاعتبار إن لو عندنا شعر أبيض لا ينصح تماما بإكمال جلستنا على باور أقل، لإن دا بيكون محفز لزيادة الشعر الأبيض أكتر.
الطرق المتاحة لإزالة الشعر خلال الحمل فترة التوقف عند جلسات الليزر
![جلسات الليزر والشفرات](https://i0.wp.com/motherscz.com/wp-content/uploads/2021/11/جلسات-الليزر-والشفرات.jpeg?resize=618%2C420&ssl=1)
مبدئيا لازم نعرف إن الليزر يعمل على بصيلة الشعر لاضعافها لحد ما نوصل للنتيجة النهائية وهي اختفاء نسبة من الشعر وبقاء نسبة قليلة جدًا تتراوح من ٢الى ١٥٪ من إجمالي شعر الجسم.
الشعر المتبقى يتميز بنعومته ولونه الفاتح (fine hair) وده بيخلي غير ظاهر من الأساس.
لا ينصح تمامًا باستخدام الوسائل القديمة لإزالة الشعر تحديدًا الوسائل القائمة على إزالة الشعر من الجذور مثل الـ wax, sweet
ودا لأنها بتساعد على تقوية البصيلة مرة تاني.
الوسائل المتاحة للحفاظ على نتيجة جلسات الليزر هى الشفرة وكريم ازالة الشعر ودا لأنها بتعمل على إزالة الشعر الخارجى بعيدًا عن البصيلات.
اقرأ أيضًا: تساقط الشعر وقت الرضاعة تغير طبيعي.. وإيه الحل؟
امتى اقدر اكمل جلسات الليزر بعد الولادة ؟
زى ما اتفقنا إن بيكون فيه تصبغات الجلد باسمها الدارج الكلف بتظهر بسبب الحمل، والكلف ده بيختفي مع الوقت بعد الولادة لحد اليوم الأربعين، عشان كده نقدر نكمل جلسات الليزر بعد أربعين يوم من الولادة نقدر نستكمل جلساتنا مع الأخذ فى الاعتبار إن الأمر يرجع لطبيب الجلدية لإنه بيكون قادر يحدد هل الجلد رجع لطبيعته مرة تانية أو لا، وفي بعض الحالات الكلف بياخد وقت اطول للاختفاء.
إزاي اختار المكان والجهاز المناسب لجلسات الليزر
![](https://i0.wp.com/motherscz.com/wp-content/uploads/2021/11/إزالة-الشعر-بجلسات-الليزر.jpg?resize=618%2C259&ssl=1)
محتاجين نتأكد من وجود طبيب جلدية سواء اختارنا عيادة أو مركز متخصص بالليزر والتجميل، في الحالتين وجود الطبيب مهم جدًا لأنه بيحدد نوع بشرتنا ودرجتها (skin type ) تجنبا لاى حروق أو حساسية ممكن تحصل بسبب الليزر نفسه .
فيه كذا نوع من أجهزة الليزر تقسيمتها الفعلية بيكون حسب نوع شعاع الليزر الناتج منها كلها تقريبًا نتائجها مرضية جدًا.
أجهزة كانديلا مناسبة جدًا لأصحاب البشرة البيضاء بدرجاتها.
لو أنتِ من أصحاب البشرة السمراء ننصحك بأجهزة اندياج مثل ديكا لأنها هتكون اختيارك الأنسب.
أخيرًا عاوزين نتفق إن كل التعليمات والنصائح خاضعة لرأى طبيب الجلدية الخاص بيكى لان طبيعة البشرة تختلف من حالة لحالة تاني. ونتمنى فترة حمل سعيدة ممتعة لكل السيدات.