Mothers Comfort Zone Mothers Comfort Zone
على قد ما مرحلة إدخال أكل جديد للبيبي ممتعة، إلا انها في نفس الوقت مرحلة مرهقة؛ خصوصًا لو كان الأكل ده من المعروف عنه إنه بيسبب حساسية لأطفال كتير.
المكسرات من أكثر الأطعمة الغنية بفوائد كتير، مش بس للكبار، لكن كمان للأطفال الصغيرين.
طب امتى أقدر أقدم المكسرات للبيبي؟ وإيه الصور اللي ممكن تخلي طفلي يتقبلها بسهولة؟ هل فيه أي خطر منها؟ وازاي أعرف إذا كان طفلي عنده حساسية منها؟
امتى ندخل المكسرات للبيبي؟
بشكل عام، تقدري تقدمي المكسرات لطفلك مع بداية دخول الطعام الصلب بداية من إتمام الطفل ٦ شهور.
لكن، لو طفلك اتعرض قبل كده لإكزيما أو حساسية لأي نوع من أنواع الطعام، استشيري طبيب الأطفال المختص قبل ما تقدميله المكسرات في روتين الطعام.
إزاي أدخل المكسرات في أكل البيبي؟
فيه خيارات كثيرة قدامك تقدري من خلالها تدخلي المكسرات للبيبي، لكن احذري استخدام المكسرات الكاملة لأنها ممكن تسبب اختناق للطفل.
من الصور المتاحة لتقديم المكسرات للبيبي:
- تقدري ترشي رشة خفيفة من المكسرات المطحونة الناعمة على أكلات طفلك.
- تقدري كمان تصنعي مخبوزات من دقيق أي نوع من أنواع المكسرات.
- ممكن تستخدمي رقائق الفول السوداني اللي بتذوب بسهولة مجرد ما طفلك يبدأ مصها.
- ممكن تضيفي رقائق الفول السوداني دي على أي نوع من أنواع الطعام اللي طفلك بيفضله.
- الأنواع المختلفة من زبدة المكسرات؛ زي زبدة الفول السوداني خيار كويس، لكن كوني حذرة في استخدامها لأن قوامها ثقيل وممكن تسبب اختناق للطفل. تقدري تخففي القوام ده بتقليبها كويس مع شوية زبادي أو بإضافة شوية مية وتقديمها للبيبي بكميات قليلة في ملعقة صغيرة. ممكن كمان تمسحي منها مسحة خفيفة على البسكويت الرقيق اللي طفلك بيفضله.
أهم حاجة في مرحلة تقديم المكسرات للبيبي، إنك تقدميها بكميات قليلة (أقل من ربع ملعقة طعام) لحد ما تطمني من رد فعل جسم طفلك ليها وتلاحظي لو أي أعراض حساسية ظهرت عليه.
اقرا أيضًا: وصفات خضار سحرية للأطفال.. أكليهم خضار من غير ما يحسوا
إيه فوائد المكسرات للبيبي؟
المكسرات بشكل عام مصدر غني بالدهون الصحية المهمة لنمو الطفل، ده طبعًا بالإضافة لمذاقها الممتع سواء للأطفال او للكبار. المكسرات كمان مصدر للبروتينات والألياف.
على سبيل المثال لا الحصر:
- عين الجمل بتحتوي على كمية كبيرة من الأوميجا ٣ المهمة للنمو الطبيعي للمخ وللعين.
- الكاچو مصدر كويس للأوميجا وكمان للنحاس (المهم لامتصاص الحديد) والماغنسيوم والأحماض الأمينية اللي بتحفز نمو الخلايا.
- اللوز مصدر غني بالألياف والبروتين النباتي والأحماض الدهنية المفيدة للقلب، بالإضافة ل الفيتامنيات والمعادن؛ زي الكالسيوم والحديد وحمض الفوليك والزينك.
هل تقديم المكسرات بدري للطفل ممكن يمنع حدوث الحساسية؟
فيه دراسة حديثة بتثبت إن تقديم المكسرات للبيبي بالطريقة المناسبة والكميات التي ينصح بها في أعمار ما بين ٤-١١ شهر قلل فرص حدوث حساسية تجاههم بنسب تصل ل ٨٠٪.
وده بيحصل لإن في الفترة العمرية دي، الجهاز المناعي بيكون لسه بيتكون وبيتعرف على المواد الخارجية.
وبالتالي بيحدد هيتعامل مع أنهي فيهم بطريقة عدوانية تسبب حساسية ومين فيهم مش هيحتاج رد فعل مناعي عنيف وبالتالي مش هيتسبب في حساسية.
ازاي أعرف لو طفلي عنده حساسية من المكسرات؟
لو طفلك بيعاني حساسية من المكسرات، هتظهر عليه أعراض من الآتية خلال عدة دقائق أو حتى ساعات:
- احمرار الجلد والحكة.
- القيء والإسهال.
- تورم اللسان والشفتين مع ضيق في التنفس.
- سيلان الأنف.
- فقدان الوعي.
- صدمة الحساسية واللي بتستدعي تدخل طبي فوري.
لو لاحظتِ أي عرض من الأعراض دي، توجهي فورًا للطبيب المختص.
أخيرًا
المكسرات فوائدها الصحية للطفل لا غنى عنها، لكن إدخالها لروتين الطعام محتاج منك شوية مجهود سواء في متابعة رد فعل طفلك بعد تناولها أو لتحضيرها في صور تعجب طفلك. لو لاحظتِ أي تغيرات جديدة على طفلك أو أي عرض من أعراض الحساسية، توجهي فورًا للطبيب الخاص عشان يقدر يتخذ الإجراءات اللازمة.
المصادر