احتضان طفل هو وسيلة تشبعي بيها رغبتك في الأمومة، وكمان توفرى للطفل دا بيت يحبه، ويرعاه، لأن في أطفال كتير أيتام في دور الرعاية عددهم 11 ألف طفل، محتاجين اهتمام وحب. وفي نوفمبر شهر الاحتضان هنقولك معلومات نتمني تفيدك عنه. بالنسبة للمسيحيين في المسيحية محرمتش الاحتضان،أو التبني.
ففي العهد القديم موسى اتبنته ابنة فرعون. والاحتضان دلوقتي متاح في مصر؛ انك تختاري طفل من دور الرعاية بشروط معينة، وبعد بحث، وشوية إجراءات، وتربيه في بيتك، لكن مش بتنسبيه ليكي، و في ستات كتير مسيحية بتسأل، هو أحنا كمان ممكن نحتضن؟
الإجابة أيوه، الاحتضان متاح كمان للمسيحيين، ووزارة التضامن الاجتماعي بتسمح للأسر المسيحية أو لامرأة لم يسبق لها الزواج، أو مطلقة، أو أرملة فوق سن 30 سنة إنها تحتضن طفل أو تبقى أسرة بديلة ليه، وبالنسبة للأسر بيتعمل بحث اجتماعي يضمن توافر النضج والمسئولية، كما لازم سنك إنتي وزوجك يبقى أكبر من 25 سنة،
وكمان بتتعهدي إنك تضمني للطفل بيئة صحية، وآمنة، وبتقدمي صحيفة الحالة الجنائية ليكي ولزوجك، وبالنسبة للأطفال معلومة النسب اللي تخلت عنهم أسرهم، بيبقى الاتصال بأسرة الطفل عن طريق الإدارة.
اقرأ أيضًا: رشا مكي في حوارنا معها.. “الكفالة مش سهلة لكن تستاهل”
شروط كفالة طفل لأسرة مسيحية
فيه بعض الشروط عشان تكفلي طفل لو كنتي مسيحية: إن ديانة الطفل تبقى نفس ديانة الأسرة، وبيبقى الطفل معلوم النسب، لازم تبقى الأسرة اقتصاديا، واجتماعيا مستعدة انها تحتضن طفل.
وخطوات الاحتضان هي نفس الخطوات المعتادة، بيتقدم بطلب لوزارة التضامن الاجتماعي، وبيتكتب طلب ويتجهز طلب ويتعرض على لجنة الموافقة والتقييم، بعد الموافقة تتوجهي لدور الرعاية المسيحية، عشان تختاري الطفل منها ويختارك، أو زي ما بتقول كل الأمهات المحتضنة بتلاقوا بعض.
أنا مسيحية ومحتاجة احتضن طفل
مع إن القوانين لا تمنع احتضان طفل من نفس ديانة الأسرة، إلا إن حتى الآن مفيش ولا أسرة مسيحية قدرت تحتضن طفل، ودا لأن فيه بعض الصعوبات زي إن دور الرعاية بترفض، أو إن الأسرة البديلة تلاقي طفل مجهول النسب في دار رعاية مسيحية.
وفي شهر التوعية بالاحتضان أحنا في Mother Comfort Zone بندعوا الدولة إنها تسهل إجراءات احتضان الأطفال المسيحية، ويبقى دور الرعاية عندها الوعي الكافي بسماح الدولة للمسيحيات بالاحتضان أيضًا، لأن في ستات كتير مسيحيات نفسها تحتضن طفل، وتبقى أم.
جروبات على فيسبوك ممكن تفيدك
لو مهتمة باحتضان طفل، ممكن تنضمي لمبادرة كفالة طفل مسيحي على فيسبوك، وكمان في جروب يلا كفالة وجروب الاحتضان في مصر وعشان تحتضني طفل من دار رعاية، لازم تتعرفي على دور الرعاية المسيحية في مصر، ودا دليل ليها.
