فقدان الوزن وقت الرضاعة هل له تأثير سلبي على طفلي

من أكثر الحاجات اللي بتؤرق أمهات كتير بعد الولادة مباشرة هي الوزن الزائد..

أمهات كتير بتفضل تسأل نفسها: هو أنا هعرف أرجع لوزني قبل الحمل؟ امتى هرجع رشيقة تاني زي زمان؟ وتبدأ تدور أكتر وتسأل أكتر عشان تلاقي وسيلة تساعدها ويطرق ذهنها تساؤلات أكتر وأكتر..

الرضاعة الطبيعية هتساعدني فعلًا أنزل وزني؟ إيه الدايت المناسب ليا وقت الرضاعة؟ طب لو مشيت على دايت قاسي عشان أنزل وزني بسرعة، ده مش هيأثر على طفلي؟

هل الرضاعة الطبيعية هتساعدني أنزل وزني؟

الرضاعة الطبيعية مش بس بتغذي طفلك وتوفرله حماية من أمراض كتير، دي كمان بتساعدك بشكل كبير في فقدان الوزن وقت الرضاعة.

عشان جسمك يقدر يفرز اللبن وترضعي طفلك بشكل صحي وسليم، جسمك بيستخدم الخلايا الدهنية اللي اتخزنت في جسمك خلال فترة الحمل، ده بالإضافة للسعرات الحرارية اللي بتدخل جسمك يوميًا من خلال نظامك الغذائي. وده طبعًا بيساعدك بشكل مباشر في فقدان الوزن وقت الرضاعة.

اقرأ أيضًا: الرضاعة المستحثة.. الحل السحري لأمهات الاحتضان

طب هل ده معناه إني المفروض أقلل السعرات الحرارية اللي بتناولها في يومي؟ 

لا مش صحيح، الحقيقة إن العملية اللي ذكرناها دي -واللي بتساعد الأم في نزول وزنها بشكل طبيعي وقت الرضاعة- بتحصل مع إضافة الأم  ٣٣٠-٤٠٠ من السعرات الحرارية لنظامها الغذائي اليومي، ودي الكمية الموصى بها من الهيئة القومية لصحة الطفل.

مش بس كده، تقليل السعرات الحرارية اليومية هيؤثر بشكل سلبي على صحتك وعلى صحة طفلك لأنه بالتأكيد مش بيوفرلك الطاقة اللازمة ليومك وبيقلل من إفراز اللبن للطفل.

المعدل الطبيعي لفقدان الوزن بعد الولادة

فيه عوامل كثيرة ممكن تؤثر على معدل فقدانك للوزن اللي اكتسبتيه خلال الحمل؛ أبرز العوامل دي:

• معدل الأيض (الحرق) الخاص بكِ.
• نظامك الغذائي.
• معدل ممارستك للرياضة ونشاطك اليومي بشكل عام.
• الوزن اللي اكتسبتيه خلال الحمل كان قد إيه.

باختلاف العوامل دي، ممكن تفقدي وزنك الزائد ده في فترة بتتراوح من ٦ شهور لسنة أو أكثر.

طب إيه المعدل الطبيعي لفقدان الوزن وقت الرضاعة؟

بعد الولادة مباشرة، جسمك بيفقد حوالي ٦,٨ كيلو جرام من وزنك. الفقدان السريع ده بيكون نتيجة خروج الطفل والمشيمة والسائل الأمنيوسي.

لكن بعد كده، معدل فقدانك لوزنك الزائد بيكون تدريجي أكثر وبيتراوح بين ( ٠,٤٥ – ٠,٩ ) كيلو جرام في أول ٦ شهور بعد الولادة.

نصائح لفقدان الوزن وقت الرضاعة بطريقة  صحية 

تقليل السعرات الحرارية مش حل مناسب لفقدان وزنك الزائد وقت الرضاعة، لكن بالتأكيد فيه طرق أخرى تساعدك في ده.

دي بعض النصائح اللي تقدري تتبعيها عشان تفقدي وزنك بشكل آمن خلال الرضاعة:

• مارسي رياضة يومية خفيفة، لكن استشيري طبيبك الخاص أولًا قبل ممارسة أي رياضة بعد الولادة. تقدري تبدأي بالتدريج بتمشية قصيرة مع طفلك من ٢٠-٣٠ دقيقة يوميًا. احرصي إنك ترضعي طفلك قبل التمشية دي أو ممارسة أي رياضة عشان تتجنبي احتقان الثدي.

اعرفي أكثر عن احتقان الثدي ومشكلات الرضاعة الطبيعية الأخرى من خلال المقال ده.

• اشربي سوائل أكثر، شرب الماء بكمية مناسبة يوميًا (حوالي  ١٢ كوب)  هيساعدك تتخلصي من وزنك الزائد خلال الرضاعة. 
• متفوتيش وجبات في يومك. بالرغم من إنك ممكن تفكري إنك لما تفوتي وجبة هتساعدي في فقدان الوزن أسرع، إلا إن ده بيبطأ من معدل الحرق ويبطأ من فقدانك لوزنك بالإضافة إنه بيفقدك الطاقة اللازمة ليومك. 

أخيرًا،

افتكري دايمًا إن الوزن اللي اكتستبيه خلال فترة الحمل لنمو طفلك هو تطور طبيعي أخد شهور طويلة، مينفعش تكوني قاسية على نفسك وتحاولي تفقديه بين يوم وليلة.

كل اللي عليكي إنك تمارسي أي رياضة خفيفة وتتبعي نظام غذائي صحي بدون ما تقللي السعرات الحرارية اليومية اللي جسمك محتاجها.

المصادر

Healthline

Mayoclinic

Parenting.firsrcry