Mothers Comfort Zone Mothers Comfort Zone
كتبت/ شيري رمسيس
بعد ما تبعنا في المقال الأول حكايات جنا وحبيبة، وإزاي تغير شكلهم خلال فترة المراهقة والبلوغ والتعامل الخاطئ للأم والعائلة إزاي ممكن يكون السبب في أزمة نفسية حيقية عند البنات، تعالوا نشوف حكاية مايا وإزاي لما الأم تقدم الدعم بشكل صحيح.
شعري مضايقني أوي، مش عارفة اخلي شكله حلو، كان نفسي يبقى شعري ناعم و طويل زي شعر هانيا، أو حتى كيرلي و أصفر زي شعر تيا، لكن أنا شعري مش ناعم و مش كيرلي، شعري غلس، ماما بتقولي شعرك حلو، لكن أنا مش حاسه بكده.
كنت عاوزة أعمل شعري بروتين، في بنت في الفصل عملته وشعرها بقى ناعم خالص، بس ماما قالت البروتين ده مش صحي وغلط عليا وإن الأحسن أني أحب شعري و اتعلم أخلي شكله حلو، أنا عارفه إن كلام ماما صح وأنها بتقولي الحقيقة، بس أنا لسه متضايقه من شعري.
الشهر اللي فات ماما أخدت بالها إني بقرب أوي من الكتاب وأنا بذاكر، ماما قالت لازم نروح لدكتور العيون نطمن على عينايا، رحنا والدكتور كشف وقال إني محتاجة نضارة، الموضوع ده ضايقني أوي ساعتها، ما كنتش عاوزه أبقى البنت أم نضارة.
ماما قالت إن النضارة هتريح عينايا وإننا هنجيب نضارة شكلها جميل وهتعجبني، رحنا محل النضارات و كان فيه نضارات كتير أوي وفي منهم نضارات شكلها روش ولذيذة أوي، زي نضارات سناب شات، فضلت أجرب نضارات كتير وكان في نضارات شكلها مضحك.
ماما فضلت تضحك معايا على النضارات وهي كمان جربت نضارات كتير وفضلنا نتصور قدام المراية في المحل لحد ما لقيت واحدة عجبتني، وأكتر واحده عجبتني فيهم ماما قالت إيه رأيك نجيب للنضارة سلسلة فيها خرز ملون علشان ما تقعش منك.
وجبنا سلسلة خرز ألوانها تحفة وروشه جدًا كمان مع تسريحة الشعر الجديدة بتاعتي، ماما كمان جابت نضارة شمس شبه بتاعتي، ولما لبست النضارة عنيا ارتاحوا و شفت أحسن و حسيت إن النضارة دي مفيدة بجد، طلع ماما عندها حق.
اقرأ أيضًا: سلسلة صرخة مراهق الحلقة الرابعة.. أزمة الهوية في فصل (5/C)
اتصورت أنا وماما بالنضارات الجديدة وماما حطت الصورة على الفيسبوك وأنا شيرتها من عندها، وروحت المدرسة و فرجت نضارتي الجديدة لأصحابي و عجبتهم.
انا بلعب سباحة من زمان، من وأنا عندي خمس سنين بس دلوقتي مابقتش عاوزه أكمل فى السباحة، مش عارفة ليه زهقت منها كده، ماما كانت مستغربة أوي بس بعد شويه قالت لي براحتك.
نفسي أعمل حاجة جديدة حاجة جديدة و مثيرة..
لما قلت لماما شجعتني وقالت: يلا اختاري حاجة جربيها.
قولت: خايفه اختار حاجة وبعد كده ازهق منها !!
قالت : ده عادي في سنك، اللي في سنك لازم يجربوا علشان يعرفوا هما بيحبوا ايه.
لما روحت النادي شفت بنات وأولاد بيتدربوا على الـ بتيناج، وقفت اتفرج عليهم و عجبتني أوي اللعبة دي، وقلت لماما أنا عاوزه اتدرب بتيناج وأخدتها معايا اتفرجنا على الأولاد اللي بيتدربوا، شكلهم كان جميل أوي و حاجة تجنن بجد.
ماما قالت ماشي نشوف الموضوع ده، دخلنا محل في النادي نسأل على البتيناج طلع غالي أوي!
ماما قالت لو عاوزاه بجد حوشي نص تمنه وأنا هدفع لك النص التاني، وأنا وافقت وبعد أسبوعين جه العيد وتيتا و جدو ادوني عيدية، كمان خالو وخالتو وأعمامي الأتنين، أنا دلوقتي معايا أكتر من نص تمن البتيناج.
وفعلاً لما قولت لماما ها أنا معايا الفلوس نجيب البتيناج أمتى؟
ماما قالت: الأسبوع الجاي لما أقبض ونبتدي تدريب من أول الشهر الجديد.
لما روحنا النادي أخدت الفلوس بتاعتي معايا وقبل ما ندخل المحل ماما اديتني نص تمنه زي ما أتفقنا، وفعلاً اخترت بتيناج لونه موف وشكله تحفة وكان يجنن عليا، ماما قالت لعمو “حلو هناخده”.
أنا اللي دفعت الفلوس و خرجت وأنا واخده البتيناج في حضني وهطير من الفرحة، رحنا أنا وماما وحجزنا التدريب والأسبوع الجاي هتكون أول حصة، لازم أخلص مذاكرتي أول بأول علشان يكون عندي وقت للتدريب زى ماوعدت ماما، أنا مبسوطة أوي بالبتيناج بتاعي ومبسوطة إني هجرب حاجة جديدة .
