٧ أفكار جديدة للانش بوكس صحية لطفلك

مع بداية الدراسة، بتبدأ حيرتك كأم تزيد؛ ازاي أقدر أوفر لطفلي غذاء مناسب ليومه المدرسي؟

أكيد بتواجهك تحديات كتير عشان توصلي لنتيجة ترضي طفلك وتحببه في الأكل، وفي نفس الوقت تغذيه وتكون صحية.

عشان كده محتاجة تجددي كل يوم وتنوعي بين كل خيارات الطعام الصحي الموجودة.

أفكار لتحضير اللانش بوكس

بان كيك

وصفة سريعة بيحبها الأطفال والكبار كمان، وتقدري تحضريها بسهولة.

• اخلطي كوب دقيق مع ملعقتين سكر وملعقتين صغيرين بيكنج باودر ورشة ملح.
• اخلطي بيضة مع كوب لبن وملعقتين زيت نباتي.
• قلبي كل المكونات السابقة مع بعض.
• سخني صينية كويس وادهنيها بالزيت وصبي من السائل اللي عملناه بالسُمك اللي تفضليه.
• بعد ما توصلي للون المرغوب فيه، خرجيها من الزيت وضيفي عليها ملعقة عسل أو شوكولاتة سائلة.

مكرونة بالصلصة

المكرونة من أكتر الأكلات اللي الأطفال بيحبوها؛ عشان كده ممكن نقدمهلهم في صورتها التقليدية أو نضيف عليها أي إضافات من الخضار اللي أطفالنا بيفضلوه.

ممكن كمان نضيف معاها في اللانش بوكس قطع دجاج عشان تزود قيمتها الغذائية لطفلك.

اقرأ أيضًا: وصفات الكوسة للرضع.. 5 وصفات سهلة ولذيذة

ميني بيتزا

الميني بيتزا وجبة سهلة ومحبوبة وبتديكي الفرصة تضيفي لها عناصر كتير تفيد طفلك وتخليها وجبة متكاملة.

تقدري تغيري فيها كتير وتعمليها بالخضار أو بأنواع الجبن المختلفة أو بقطع الدجاج أو المشروم.

مافن البيض بالخضار

وصفة مغذية وكمان جذابة لطفلك. 

• اقلي ربع كوب سبانخ مع طماطم وبصل في ملعقة زيت زيتون لمدة عشر دقايق وبعدين سيبيهم يبردوا.
• امزجي ٦ بيضات في ربع كوب حليب مع رشة ملح وفلفل.
• اخلطي كل المكونات مع بعض لحد ما يبقوا متجانسين.
• صبي الخليط في قوالب المافن واخبزيه في الفرن لمدة ثلث ساعة.

خضار سوتيه

من أكتر الوصفات الغنية اللي ممكن تضيفي لها معظم أنواع الخضار اللي بتدي طفلك عناصر صحية ومفيدة. ومن أكتر أنواع الخضار الموجودة اللي تقدري تستخدميها في السوتيه هي: الجزر والكوسة والبروكلي والفاصوليا.

السمبوسك

السبمبوسك إضافة سهلة وغنية تقدري تعمليها بالجبن أو باللحوم أو بالخضار بحسب ما بيفضل طفلك.

سلطة الفواكه

من أسهل الوصفات وأكترها فايدة لطفلك. احرصي دايما إنك تضيفي أنواع فاكهة مختلفة بحسب الموسم وخلي سلطة الفواكه دايما ضمن وجبة طفلك.

نصائح عند تحضير اللانش بوكس 

رغم كثرة الوصفات والأفكار الجديدة لتحضير اللانش بوكس، الأهم من كده إننا نهتم ببعض الحاجات زي:

• اللانش بوكس مينفعش يغني عن وجبة الفطار؛ لازم الطفل يفطر حتى لو حاجة بسيطة في البيت قبل ما ينزل.

• نحاول نخلي الوجبة اللي بنديها للطفل في اللانش بوكس متكاملة؛ بمعنى إنها تحتوي على الكربوهيدرات والألياف والبروتينات والخضار والفاكهة المختلفة.

• تزيين الأكل وتغيير شكله بيفرق جدا في تقبل الطفل له وإقباله على الأكل بشكل عام.

• متنسيش تضيفي سناكس خفيفة غير الوجبة الرئيسية، زي البسكوت والفشار والكوكيز والقراقيش. 

الإضافات دي هتبعد طفلك عن شراء السناكس اللي فيها مواد حافظة بتضر جسمه.

أخيرًا، رغم إن تحضير اللانش بوكس من أكتر الحاجات اللي دايما بتخليكي في حيرة، إلا إنها فرصة ذهبية تقدري تحببي بيها طفلك في أنواع الأكل الصحي المختلفة. كل اللي عليكي إنك تختاري الوصفات اللي تناسب طفلك مع تزيينها والتجديد فيها بشكل مستمر يخلي طفلك يستمتع بيها.