تساقط الشعر وقت الرضاعة تغير طبيعي.. وإيه الحل؟

مع نهاية رحلة الحمل ووصول الطفل اللي طال انتظاره، بيحصل تغيرات كتير في أجسامنا. بعض التغيرات دي بتكون غير ملحوظة، لكن بعضها بيكون ملحوظ ويؤرق أمهات كتير.

ومن أكثر التغيرات اللي بتلاحظها معظم الأمهات بعد الولادة هي تساقط الشعر بشكل كبير، بعد ما كانوا ملاحظين تغييرات جيدة في كثافة وطول شعرهم خلال فترة الحمل.

ياترى التساقط ده مرتبط بالرضاعة الطبيعية؟ ازاي أهتم بشعري وسط كل انشغالاتي واهتمامي بمولودي الجديد؟ إيه الحل عشان أقدر أسيطر على تساقط الشعر وقت الرضاعة؟ لازم أولًا نحدد الأسباب..

أسباب تساقط الشعر وقت الرضاعة

من أكثر المعتقدات المنتشرة بخصوص تساقط الشعر وقت الرضاعة، إنه بيحصل كليًا بسبب الضغط العصبي اللي الأم بتتعرض له أو بسبب انشغالها بالمولود وإن معندهاش وقت تهتم بنفسها، لكن الحقيقة إن مش ده السبب.

السبب في زيادة كثافة وطول الشعر خلال فترة الحمل، وتساقطه بعد الولادة وفي أثناء الرضاعة هي التغيرات الهرمونية اللي بتحصل خلال الفترات دي.

التغيرات الهرمونية خلال الحمل والرضاعة

من أول الهرمونات اللي بتزيد نسبتها في بداية الحمل هو هرمون ال(HCG) واللي اختبار الحمل المنزلي قائم على قياس نسبة الهرمون ده في البول.

بتبدأ نسب هرمونات تانية كتير في الجسم تزيد؛ زي الإستروچين والبروچيستيرون والأوكسيتوسين والبرولاكتين واللي بدورهم بيجهزوا جسم الأم للحمل. كمان بيزيد حجم الدم عشان يواكب احتياجات الأم والجنين.

لكن السؤال اللي بيطرح نفسه دلوقتي: إزاي التغيرات دي بتأثر على الشعر؟

تأثير التغيرات الهرمونية على الشعر

بطبيعة الحال، كلنا بيتساقط شعرنا يوميًا بمعدل طبيعي ٥٠-١٠٠ شعراية في اليوم الواحد.

لكن الزيادة النسبية لهرمون الإستروچين اللي بتحصل خلال فترة الحمل بتمنع تساقط الشعر بالمعدل المعتاد؛ وده اللي بيخلي معظم السيدات في فترة الحمل يلاحظوا إن شعرهم زادت كثافته وطوله.

التغيرات دي مش بتحصل تحت تأثير الإستروچين لوحده، لكن باجتماع العوامل اللي ذكرناها كلها سوا، بالإضافة لزيادة حجم الدم ونشاط الدورة الدموية.

اقرأ أيضًا: الصيام المتقطع خلال الحمل | كيف أعادل بين وزني واحتياجات طفلي؟

إيه اللي بيحصل بعد الولادة؟ الهرمونات دي خلاص أدت وظيفتها المطلوبة وبالتالي مستوى معظم الهرمونات دي بيبدأ يقل -بعضها بالتدريج وبعضها بشكل سريع- لحد ما توصل لمستواها الطبيعي في الجسم.

وده معناه إن التساقط هيرجع لمعدله الطبيعي اللي كان موجود قبل الحمل اللي في حدود ٥٠-١٠٠ شعراية في اليوم الواحد. لكن كتير من الأمهات بيضايقهم التغير ده ، هل كده محتاجين لعلاج؟

علاج تساقط الشعر وقت الرضاعة

تساقط الشعر بعد الولادة حاجة طبيعية جدًا ومش محتاجة تقلقي منها. والحقيقة إن برغم انتشار منتجات كتير في السوق تحت مسمى علاج تساقط الشعر وقت الرضاعة، إلّا إن -حتى الآن- مفيش ما يثبت إن المنتجات دي فعّالة.

لكن دي بعض النصائح اللي تقدري تتبعيها للسيطرة على تساقط الشعر أثناء الرضاعة:

تجنبي كوي الشعر أو استخدام الحرارة سواء في تنشيفه أو فرده.
سرحي شعرك بلطف من غير ما تشديه، ويفضل تسرحيه مرة في اليوم.
نوعي في أكلك؛ كلي خضار وفاكهة بشكل يومي خصوصًا اللي فيهم حديد.
خدي ڤيتامينات، لكن بعد استشارة الطبيب إذا كانت مناسبة للرضاعة.

أخيرًا

تساقط الشعر وقت الرضاعة أمر طبيعي بتتعرض له معظم السيدات نتيجة تغيرات الهرمونات بعد الولادة. إذا لاحظتِ إن تساقط شعرك أكثر من الطبيعي أو مر على الموضوع أكثر من سنة بعد ولادة طفلك، استشيري الطبيب المختص عشان يقدر يحدد السبب ويرشدك للعلاج المناسب.

المصادر