Mothers Comfort Zone Mothers Comfort Zone
كتبت: تقى خالد
آلام شديد في المفاصل.. صوابعي على طول وجعاني.. طقطقة في الركب.. وجع عظم الحوض…
أعراض بتشتكي منها معظم الأمهات الجدد، سواء الآلام دي بدأت وقت الحمل وفضلت مستمرة مع الرضاعة أو إن الآلام دي ظهرت بعد الولادة.
إيه أسباب الأعراض دي؟ هل آلام المفاصل وقت الرضاعة يخليني أقلق على صحتي أو صحة طفلي؟ ازاي أقدر أتغلب على الآلم ده أو أتجنب حدوثه من البداية؟
هل الرضاعة الطبيعية تسبب ألم المفاصل؟
بالرغم من الاعتقاد الشائع إن الرضاعة الطبيعية هي السبب الرئيسي وراء آلام المفاصل اللي بتعانيه معظم الأمهات الجدد، إلّا إن الاعتقاد ده مش صحيح كليًا.
السبب الرئيسي لآلام المفاصل هو التغيرات الهرمونية اللي بتحصل خلال الحمل وبعد الولادة.
لكن ده ميمنعش إن أوضاع الرضاعة الطبيعية الخاطئة بالتأكيد ممكن تسبب ألم المفاصل والعظام للأم، بالذات في منطقة الظهر والكتف مع الرضاعة لفترات طويلة.
كمان قلة النوم والإرهاق الشديد اللي بيكون مصاحب لفترة الرضاعة بيساهم بشكل كبير في بدء ظهور آلام المفاصل.
بالإضافة لكده، خلال الرضاعة الجسم بتزيد متطلباته من الكالسيوم عشان يقدر يفرزها للطفل في لبن الأم. زيادة متطلبات الكالسيوم دي ممكن تؤثر على العظم والمفاصل عند الأم. لكن، من حسن الحظ إن جسم الأم بيقدر يعوض معظم التغيرات دي خلال ست شهور بعد فطام الطفل.
اقرأ أيضًا: تساقط الشعر وقت الرضاعة تغير طبيعي.. وإيه الحل؟
أسباب ألم المفاصل وقت الرضاعة
أهم سبب لألم المفاصل وقت الرضاعة هو التغيرات الهرمونية؛ اللي أبرزها انخفاض هرمون الإستروچين بنسبة هائلة بعد الولادة مباشرة.
من أهم فوائد هرمون الإستروچين هي حماية المفاصل وتقليل حدوث الالتهابات.
وبالتالي الانخفاض الهائل اللي بيحصل في نسبة هرمون الإستروجين في الدم ممكن يظهر على شكل آلام المفاصل اللي معظم الأمهات الجدد بيحسوا بيها.
علاج ألم المفاصل وقت الرضاعة
آلام المفاصل بالتأكيد شئ مؤرق بيؤثر على نشاطك اليومي وعلى اهتمامك بنفسك وبمولودك الجديد.
دي بعض النصائح اللي تقدري تتبعيها عشان تتجنبي الآلم ده وتقدري تمارسي يومك بشكل طبيعي:
- غيري وضع الرضاعة الطبيعية لحد ما توصلي للوضع الأريح اللي ميسببلكيش أي آلم.
- نوعي في أكلك واحرصي إنك تتناولي خضار وفاكهة يوميًا.
- قللي من شرب الكافيين.
- تدليك الجسم بلطف سواء بنفسك أو باللجوء للمراكز المتخصصة. تقدري تستخدمي الزيوت المعروفة بتخفيف الالتهابات وآلام المفاصل، زي زيت اللاڤندر.
- تناولي المكملات الغذائية؛ خاصة اللي بتحتوي على ڤيتامين د والكالسيوم.
- حاولي تحافظي على رياضة يومية بسيطة من غير ما تضغطي على المفاصل، زي ممارسة اليوجا.
امتى أتوجه للطبيب؟
أسباب آلام المفاصل وقت الرضاعة كثيرة؛ منها الطبيعي جدا بعد تغيرات الحمل ومنها اللي محتاج علاج.
لو حسيتي إن الألم مش بيتحسن بل بيزيد مع الوقت، توجهي للطبيب الخاص فورًا عشان يقدر يشخص بشكل مظبوط ويحدد خطة العلاج المناسبة.
أخيرًا
ألم المفاصل وقت الرضاعة عَرَض بتشتكي منه معظم الأمهات الجدد بسبب التغيرات الهرمونية الهائلة اللي بتحصل بعد الولادة مباشرة. تقدري تسيطري على الألم ده ببعض التمارين والحفاظ على نظام غذائي صحي بعد استشارة الطبيب المختص.
المصادر