Mothers Comfort Zone Mothers Comfort Zone
“كنت طفلة بريئة مكملتش 12 سنة، مش ناسية اليوم ده بكل تفاصيله المؤذية.. مش ناسية اجتماع أمي مع الست دي عشان يقيدوا حركتي.. مش قادرة أستوعب ليه قرروا يقطعوا جزء من جسمي؟ ليه قرروا يؤذوني بالشكل ده؟”
ضياع حقوقي، انتهاك حرمة جسدي.. وصل الأمر لتشويه جزء من جسمي بحجة إني أكون جاهزة للزواج!
إيه هو الختان؟
الختان هو إزالة جزء من أعضاء المرأة التناسلية الخارجية بغرض غير طبي. عملية الإزالة ممكن تشمل جزء صغير من الأعضاء التناسلية الخارجية وممكن تصل لإزالتها كليًا. الختان تشويه صريح لجسم المرأة وانتهاك لحقوقها الأساسية.
أضرار الختان المباشرة
عملية الختان ملهاش أي فائدة طبية، بل إنها لا تخلو من الأضرار والمضاعفات اللي ممكن تصل للوفاة. أبرز المضاعفات اللي ممكن تحصل فورًا بعد عملية الختان:
- النزيف الشديد.
- تورم الأنسجة.
- حدوث عدوي، زي التيتانوس وغيرها.
- الألم غير المحتمل.
- ارتفاع درجة الحرارة.
- مشاكل أثناء التبول.
- مشاكل في التئام الجرح.
- إصابة الأنسجة المحيطة.
أضرار الختان على المدى الطويل
أضرار الختان مش مقتصرة بس على المضاعفات الفورية اللي بيتسبب فيها، لكن كمان فيه مضاعفات بتفضل مصاحبة للبنت طوال حياتها زي:
- مشاكل أثناء التبول زي الألم المصاحب للتبول والالتهابات.
- إفرازات مهبلية وعدوى قد يصاحبها حكة.
- ألم شديد أثناء نزول دم الدورة الشهرية.
- ألم أثناء العلاقة الزوجية وفقدان المتعة الجنسية.
- زيادة احتمالية حدوث مضاعفات أثناء الولادة زي زيادة النزيف والحاجة للجوء للولادة القيصرية، وكمان زيادة خطر وفيات حديثي الولادة.
- تأثير نفسي شديد على البنت زي الاكتئاب والقلق اللي ممكن يوصل لاضطراب ما بعد الصدمة.
اقرأي أيضًا: يعني إيه تولدي بنت في مجتمع ذكوري؟
ليه الختان مستمر في مجتمعاتنا رغم أضراره الواضحة؟
أسباب الختان بتختلف من مجتمع للتاني؛ منهم أسباب اجتماعية ومنهم اللي بتتستر بعباءة الدين ومنهم اللي بيقلد من غير وعي.
بعض المجتمعات بتتعامل مع الختان على إنه جزأ لا يتجزأ من من تربية البنات وتحضيرهم للحياة الزوجية فيما بعد.
البعض الآخر بيعتقد إن الختان بيقلل من الرغبة الجنسية عند البنت، وبالتالي يضمن شرفها وعدم انخراطها في أي علاقات قبل الزواج.
وبالرغم من خلو النصوص الدينية من الحث على أي نوع من أنواع ختان الإناث، إلا إن بعض الممارسين للعادة دي بيتستروا تحت عباءة الدين وبيدّعوا إن دينهم بيأمرهم بكده.
اقرأي أيضًا: علاقات مؤذية.. ليه الستات بتتعرض للعنف الجسدي؟!
الختان في مصر
نجحت بالفعل حملات التوعية والمبادرات اللي بتهدف للحد من ارتكاب جريمة الختان في مصر في نشر الوعي لكثير من العائلات وساعدتهم في اتخاذ قرار بعدم تعريض بناتهم لتشويه جسمهم بعد معرفتهم بأضرار الختان الجسيمة.
. لكن، للأسف يبقى بعض الناس اللي بيرفضوا الاستجابة وبيصمموا على ختان بناتهم سواء لاعتقاد ديني أو مجتمعي.
وهنا بيأتي دور الحكومة المصرية ومجهوداتها البارزة للقضاء على عادة ختان الإناث في مصر بتغليظ العقوبة لجريمة الختان، وموافقة مجلس النواب المصري على قوانين رادعة نصت على: “معاقبة كل من طلب ختان أنثى وتم ختانها بناء على طلبه بالسجن لمدة لا تقل عن ٥ سنوات، فإذا نشأ عن ذلك الفعل عاهة مستديمة تكون العقوبة السجن المشدد لمدة لا تقل عن ٧ سنوات، أما إذا أفضى الفعل إلى الموت تكون العقوبة السجن المشدد لمدة لا تقل عن ١٠ سنوات”.
أخيرًا
الختان جريمة وانتهاك صريح لحقوق المرأة.. إيدنا في إيد بعض ننهي العادة دي ونوعي الناس بأضرار الختان اللي ملهاش حد عشان ننقذ بناتنا ونوفرلهم الحياة الأفضل اللي يستحقوها.
المصادر